२३ वर्षीया महिलालाई विवाह गर्ने प्रलोभन देखाएर सामाजिक सञ्जाल मार्फत चरित्र हत्या गरेको कसुरमा जिल्ला अदालत रुपन्देहीले लुम्बिनी साँस्कृतिक नगरपालिका– ६ तरकुल्लाका २९ वर्षीय मोहम्द इलियासलाई ४० हजार जरिबाना गर्ने फैसला गरेको छ ।
जिल्ला अदालतका न्यायाधीश नारायण सापकोटाको ०८२ पुस २७ गतेको इजलासले आरोपितलाई कसुर ठहर गर्दै ४० हजार जरिवाना ३० हजार क्षतिपूर्ति बापत पीडितलाई भराइदिने र १ हजार ६ सय रुपियाँ पीडित राहतकोषमा दाखिला गर्ने फैसला गरेको जिल्ला अदालतका सूचना अधिकारी पदम अर्यालले जानकारी दिनुभयो ।
आरोपितले पीडितलाई ०८१ वैशाख १ गतेदेखि पटक पटक सामाजिक सञ्जालमा मार्फत अश्लीन फोटो बनाई चरित्र हत्या गरेको भन्दै पीडित पक्षले वैशाख २ गते जिल्ला प्रहरी कार्यालय रुपन्देहीमा विद्युतीय अपराध सम्बन्धी कसुरमा उजुरी दिएका थिए । प्रहरीले आरोपितलाई वैशाख ३ गते घरबाटै गिरफ्तार गरेको थियो ।