जेनजी आन्दोलनको क्रममा कास्की जिल्ला प्रहरी कार्यालयमा आगजनी हुँदा घाइते भएका चितवन जिल्ला भरतपुर महानगरपालिका–१० का ४३ वर्षीय विजय लामाको उपचारका क्रममा मृत्यु भएको छ । पोखरा महानगरपालिका– १६ मा बस्दै आएका लामा कतिपयलाई शुक्लागण्डकी– ११ पनि ठेगाना बताउने गरेका थिए ।
आगोले करिब ७० प्रतिशत शरीर जलेपछि उनलाई पोखरा स्वास्थ्य विज्ञान प्रतिष्ठान अन्तर्गत पश्चिमाञ्चल क्षेत्रीय अस्पताल पु¥याइएको थियो । अस्पताल प्रशासनले लामाको ०८२ भदौ २७ बिहान १२ बजे मृत्यु भएको पुष्टि गरेको छ ।
आन्दोलन उग्र बन्दै जाँदा प्रदर्शनकारीहरूले विभिन्न सरकारी कार्यालय तोडफोड र आगजनी गरेका थिए । कास्कीका अधिकांश कार्यालय ध्वस्त भएपछि उनीहरू डोजरसहित जिल्ला प्रहरी कार्यालयतर्फ पुगेका थिए । गेट भत्काउँदै कार्यालयभित्र प्रवेश गरेका प्रदर्शनकारीहरूले तोडफोड, लुटपाट र आगजनी गरेका थिए । प्रहरीले लुटिएको केही हतियार फिर्ता पाएको र केही अझै हराइरहेको जनाएको छ ।
सोही क्रममा प्रहरी कार्यालयमा डोजर लिएर प्रवेश गरेका एक युवक गोली लागेर घाइते भएका छन् र हाल उनको उपचार भइरहेको प्रहरीले जनाएको छ । प्रदर्शनकारीहरूले रत्नचोकस्थित अभि इक्युपमेन्ट डिभिजन कार्यालयबाट डोजर, लोडर, स्काभेटर र टिप्पर निकालेर सडकमा तोडफोडमा प्रयोग गरेका थिए ।