भारतको बिहार राज्य सुपौल जिल्ला किसनपुर थाना बस्ने महमद सद्दामका सात वर्षीया छोरा मैजुफ अलामलाई अपहरण गरी नेपाल ल्याई बन्धक बनाएको आरोपमा प्रहरीले तीन जनालाई मङ्सिर २५ गते गिरफ्तार गरेको छ ।
पीडित बालकलाई मङ्सिर २० गते भारतबाट अपहरण गरी नेपाल ल्याएर बन्धक बनाएको आरोपमा प्रहरीले गौरीगञ्ज गाँउपालिका–६ का ४७ वर्षीय बद्री यादव, सोही गाउँपालिका–४ का ३१ वर्षीय श्रीप्रसाद मलाह र उनकी २७ वर्षीया पत्नी अन्जु मुखियालाई गिरफ्तार गरेको हो ।
आरोपिततहरूले घर नजिकै खेलिरहेका बालकलाई मङ्सिर २० गते भारतीय नागरिकको सहयोगमा अपहरण गरी विट्टु मलाहको घरमा दुई दिन र मङ्सिर २२ गतेदेखि दमकस्थित देउराली होटलको कोठा नं. १०७ मा बन्धक बनाएर राखेको अवस्थामा बालकको उद्धार मङ्सिर २५ गते गरी अभिभावकको जिम्मा लगाएको जिल्ला प्रहरी कार्यालयका डिएसपी महेन्द्रकुमार श्रेष्ठले बताए ।
आरोपितहरूले पीडितका बावुबाट १५ लाख भारतीय रुपियाँ फिरौती माग गरेको प्रारम्भिक अनुसन्धानबाट खुलेको डिएसपी श्रेष्ठले बताए ।
नेपाल प्रहरीले भारतीय प्रहरीसँग समन्वय गरी बालकलाई अभिभावकको जिम्मा लगाएको छ । आरोपितहरूलाई इलाका प्रहरी कार्यालय दमकमा राखी थप अनुसन्धान थालिएको डिएसपी श्रेष्ठको भनाई छ ।