जुगल गाउपालिका–७ की कृषक सावित्री घिमिरेले लगाएको धान बालीमा डडुवा रोग लाग्दा के उपचार गर्ने भन्ने सल्लाह लिन गाउँपालिकाको कृषि शाखामा पुग्दा समेत कृषि प्राविधिक पाउनु भएन । कृषि प्राविधिकको सल्लाह नपाउँदा उहाँले खेतमा लगाएको धानमा डडुवा रोगले ग्रस्त बनाएको बताउनु भएको छ ।
कृषि प्राविधिकको सल्लाह लिएर उपचार गर्न पाएको भए धानमा लागेको रोग निको हुन्थ्योहोला । तर, प्राविधिक नपाउँदा यस वर्षको मेहनत त्यसै खेर जाने हो की भन्ने चिन्त लागेको घिमिरेले भन्नुभयो ।
सोही गाउपालिका–४ का रुद्रप्रसाद अधिकारीको पनि गुनासो त्यस्तै छ । ‘खै अब त गाउँगाउँमा सिंहदरवार आयो भन्छन् । तर हामी किसानको खेतबारीमा लगाएको बालिमा रोगलाग्दा कृषि प्राविधिक समेत पाएनौं’ ।
‘माटो अनुसारको बालिनालि लगाउँदाहोस् वा लगाएको बालिनालिमा किरा लाग्दाहोस् के गर्ने भनेर प्राविधिकको सल्लाह पाइँदैन’ । कृषक सावित्री घिमिरेले गुनासो गर्नुभयो ।
भौगोलिक रूपले जिल्लाकै सबैभन्दा ठूलो गाउपालिका रहेको जुगल गाउँपालिकाले “एक गाउँ एक कृषि प्राविधिक” कार्यक्रम सञ्चालन गरिरहेको भने पनि पर्याप्त कृषि प्राविधिक नहुँदा कृषकहरूले प्राविधिक सेवा पाउन सकेका छैनन् ।
उहाँहरूले गाउँपालिका कृषि शाखा प्रमुख लालबाहादुर बयकसँग प्राविधको माग गर्दा कुनै सुनुवाई नभएकोले रोग नियन्त्रण हुन नसकेको र उचित प्राविधिक सल्लाह नपाउँदा कृषि उत्पादनले जीवन धान्न मुस्किल भएको इन्सेक जिल्ला प्रतिनिधिलाई बताउनु भयो ।
सात ओटा वडा रहेको सो गाउँपालिकामा तीन जना मात्र कृषि प्राविधिकहरू रहेको गाउपालिकाको कृषि शाखा प्रमुख बयकले बताउनुभयो । तीनजना पनि कार्यक्रम अवधिभरका लागि करारका कर्मचारी हुन् । तीनजना प्रविधिक मध्य पनि एकजनाले गाउँपालिकाको कृषि शाखामा प्रशासनको काम गरेर बस्नु पर्ने भएकाले दुई जना प्राविधिक कृषकहरूको खेतवारीमा पुग्न त परै जाओस सल्लाह लिन कार्यालयमा आएका कृषकहरूलाई सल्लाह दिन समेत नभ्याएको प्रमुख बयकले बताउनुभयो ।
प्रयाप्त प्राविधिकहरूको अभावमा गाउँगाउँमा किसानको खेतबारीमा पुगेर सेवा दिने भनिए पनि प्राविधिकको अभावले सो पुरा गराउन नसकेको बयकले बताउनुभयो ।
गाउँपालिकाकी उपाध्यक्ष सिर्जना तामाङले कृषकको माग सम्बोधन गरिने बताउनुभयो । उहाँले गाउँपालिकाले कृषि प्राविधिकको प्रयाप्त मात्रामा ब्व्यवस्था गरी कृषकहरूलाई सेवा दिने बताउनुभयो ।
समयमा मल बिउ नपाउने समस्या त छदैछ । तर, कृषकले लगाएको बालिमा रोग लाग्दा कृषि प्राविधिकको सल्लाह नपाउँदा कृषि उत्पादनमा कमी आएको जिल्ला समन्वय समितिका उपप्रमुख बालकुमारी सापकोटाले बताउनु भयो । यो समस्या जिल्ला भरिको समस्या भएकाले केन्द्र सरकारले नै यो समस्यालाई समाधान गनुपर्ने उहाँको सुझाव छ ।