अवैध रूपमा मागिएको रकम नदिँदा सुनसरीको सीमावर्ती भोक्राहा नरसिंह गाउँपालिका–७ नरसिंहकी शोभा मेहतालाई उल्टी अस्थायी प्रहरी चौकीका असई गजेन्द्र कटुवालले कुटपिट गरेका छन् ।
पीडित महिलाले घर सञ्चालनका लागि सीमापारीबाट समान ल्याउने क्रममा कात्तिक १७ गते कटुवालले सीमामा रोकेर सोधपुछ समेत नगरी थप्पडले हिर्काएर आक्रमण गरेको स्थानीयहरूले बताएका छन् ।
पीडितलाई सुरूमा पैसा मागेको र नदिएकाले थप्पड हानेको स्थानीय डीके यादवले बताए । पीडितसँग ४ हजार रुपियाँ माग गरेको र नदिने भएपछि समान खोसेर आक्रमण गरेको पीडितले बताइन् ।
पीडितले प्रहरीको आक्रमण भएकाले आफैँ स्थानीय क्लिनिकमा उपचार गराएको बताइन् । उनले घटनाको बारेमा डरका कारणले कतै उजुरी नगरेको बताइन् । आरोपितको कुटपिटबाट पीडितको अनुहार सुनिएको छ ।
जिल्ला प्रहरी कार्यालय सुनसरीका डिएसपी ज्ञानेन्द्र फुयालले घटनाको बारेमा आफूलाई केही थाहा नभएको प्रतिकृया दिए ।