विष्णपुर गाउँपालिका–३ मुसहर्नियाकी २६ वर्षीया बिनितादेवी मण्डललाई सोही ठाउँ बस्ने उनका २३ वर्षीय देवर भरत मण्डल, भरतकी पत्नी २१ वर्षीया मधुदेवी मण्डल र ५५ वर्षीया सासू इनरदेवी मण्डलले कुटपिट गरी गम्भीर घाइते बनाएको भन्दै पीडितले कारवाहीका लागि जिल्ला प्रहरी कार्यालयमा असोज ५ गते उजुरी दिएकी छिन् ।
पतिले विदेशबाट पठाइदिने रकम माग्दै आरोपितहरूले कपाल घिस्याउँदै लाठी र फलामको रडले कुटपिट गरेको पीडितले बताइन् । फलामको रडले लागेर उनको टाउको तथा आँखामुनी गम्भीर चोट लागेको छ ।
चार वर्षीया छोरासँग घरमा बसेकी पीडितका पति शिवनारायण मण्डल दुई वर्षदेखि वैदेशिक रोजगारका लागि मलेशियामा छन् ।
राजविराजस्थित गजेन्द्रनारायण सिंह सगरमाथा अञ्चल अस्पतालमा उपचार गराइरहेकी पीडितको घाउजाँचका लागि अस्पतालमा असोज ५ गते पत्राचार गरिएको इन्स्पेक्टर सुजाता तुम्वाहाम्फेले बताइन् । पीडितको उजुरी दर्ता गरी आरोपितहरूको खोजीकार्य सुरू गरिएको इन्स्पेक्टर तुम्वाहाम्फेले बताइन् ।