कियोस परियोजना अन्तर्गत अनौपचारिक क्षेत्र सेवा केन्द्र (इन्सेक) गण्डकी प्रदेश कार्यालयले रूपा गाउँपालिकामा मानव अधिकार समूह गठन तथा परिचयात्मक कार्यक्रम भदौ ४ गते सम्पन्न गरेको छ ।
कार्यक्रममा रूपा गाउँपालिका अध्यक्ष नवराज ओझाले जनताका सबै अधिकारलाई सुनिश्चित गराउन गाउँपालिका प्रतिबद्ध रहेको बताउनुभयो ।
उहाँले मानवअधिकार समूह र गाउँपालिकाबिच यसअघि पनि सहकार्य र समन्वयमा कार्यक्रम गर्दै आएको बताउँदै आगामी दिनमा पनि त्यसलाई बढाउँदै लैजाने बताउनुभयो ।
स्वास्थ्यको अधिकारलाई प्रत्याभूत गराउन कोभिड–१९ सङ्क्रमण तिव्र रुपमा फैलिएको समयमा गाउँपालिकाले प्रत्येक नागरिकको घरघरमा पुगेर स्वास्थ्य परीक्षण र आवश्यक स्वास्थ्य सामाग्री प्रदान गरेको उहाँले बताउनुभयो ।
उहाँले गाउँपालिकाभित्र रहेका मुस्लिम, कुमाल, बोटे समुदायमा शिक्षा, स्वास्थ्य, खाद्य र आवासको अधिकारसँगै सचेतना मुलक अभियान सञ्चालनमा गाउँपालिका सहकार्य गर्न तयार रहेको बताउनुभयो ।
गाउँपालिका उपाध्यक्ष लालसुब्बा गुरुङले विगतमा गाउँपालिकासँगको समन्वयमा इन्सेकले कार्यक्रम गर्दै आएको स्मरण गराउदै नयाँ कार्यसमितिले पनि लक्षित समूहको पहिचान गर्दै उनीहरुको अधिकार स्थापित गराउन महत्वपूर्ण भूमिका खेल्ने विश्वास व्यक्त गर्नुभयो ।
उहाँले इन्सेकका कार्यक्रमलाई गाउँपालिकाबाट सदैव सहयोग रहने बताउँदै नागरिकहरुकाे शिक्षा, स्वास्थ्य, खाद्य र आवास मात्रै नभइ सबै खाले अधिकारलाई स्थापित गराउन प्रतिबद्ध रहेको बताउनुभयो ।
मानव अधिकार समूहका निर्वतमान अध्यक्ष क्याप्टन हर्कबहादुर खत्रीले शिक्षा, स्वास्थ्य, खाद्य र आवासका अधिकारका सवालमा समूहले स्थानिय सरकारसँग अझ प्रभावकारी रुपमा समन्वय गरी काम गर्न शुभकामना व्यक्त गर्नुभयो ।
इन्सेकद्वारा गठन गरिएको मानव अधिकार समूहमा तिल बहादुर खड्क संयोजक, चुना क्षेत्री उपाध्यक्ष, खस बहादुर गुरुङ सचिव, देवी न्यौपाने कोषाध्यक्ष हुनुभएको छ भने सदस्यहरुमा इरसाद मियाँ, सर्मिला खनाल, ध्रुब थापा, उदय बहादुर कुमाल, कौशिला परियार र जीवन अधिकारी रहनुभएको छ ।
इन्सेक गण्डकी प्रदेश संयोजक शिव खकुरेलले नागरिकहरुको शिक्षा, स्वास्थ्य, खाद्य र आवासको अधिकारलाई स्थापित गराउनको लागि मानव अधिकार समूहको भूमिका महत्वपूर्ण रहेको बताउनुभयो ।
उहाँले गाउँपालिकाबाट प्रवाह हुने सेवाहरू के कस्ता छन् र त्यसमा आम नागरिकहरूको पहुँच भए नभएको विषयमा मानव अधिकार समूहले ध्यान दिनुपर्ने बताउनुभयो ।
इन्सेक कार्यक्रम अधिकृत सवनम शर्माले मानव अधिकार समूहको काम, कर्तव्य तथा आचार संहिताको विषयमा जानकारी गराउँदै यसअघि मानव अधिकार समूहले प्राप्त गरेका सफलताहरूको बारेमा जानकारी दिनुभएको थियो ।