अनौपचारिक क्षेत्र सेवा केन्द्र (इन्सेक) को आयोजनामा ०८२ चैत २५ गते इन्सेक कर्णाली प्रदेशका संयोजक नारायण सुवेदीको अध्यक्षतामा मानव अधिकार सहायता कक्षको बैठक सम्पन्न गरिएको छ ।
बैठकमा यसअघि सचिवालयले गरेका निर्णयको अनुमोदन, पीडितका निवेदन, लैङ्गिक हिंसा निवारण कोषको प्रभावकारिता विषयका प्रस्तावमाथि छलफल गरिएको थियो । मानव अधिकार सहायता कक्षमा प्राप्त तीन ओटै निवेदनमा निर्णय गरिएको छ ।
बराहताल गाउँपालिका–५, की २९ वर्षीया विनिता गौतमलाई कानुनी सहायताका लागि इन्सेकले ६ हजार रुपियाँ सहयोग गर्ने, त्यस्तै गुर्भाकोट नगरपालिका–८ की २० वर्षीया सिर्जना गहतराजलाई फेडो सुर्खेतले सहयोग गर्ने र भेरीगंगा नगरपालिका–९ की ५२ वर्षीया कौशिला सार्कीलाई आर्थिक सहायताका लागि वीरेन्द्रनगर नगरपालिकाको महिला तथा बालबालिका शाखामा सिफारिस गर्ने निर्णय गरिएको इन्सेक कर्णाली प्रदेश कार्यालयका संयोजक नारायण सुवेदीले जानकारी दिनुभयो ।
बैठकमा राष्ट्रिय मानव अधिकार आयोग कर्णाली प्रदेश कार्यालय, उच्चवार एसोसिएसन सुर्खेत, फेडो, आवाज, ओसिएमसी, तथा वीरेन्द्रनगर नगरपालिकाको महिला, बालबालिका तथा ज्येष्ठ नागरिक शाखाका प्रतिनिधिहरूको सहभागिता रहेको थियो ।