अनौपचारिक क्षेत्र सेवा केन्द्र (इन्सेक) को आयोजनामा डाक्नेश्वरी नगरपालिकामा मानव अधिकार समुहद्वारा सम्पन्न कार्यको समीक्षाका साथै आगामी रणनीतिक कार्ययोजना सम्बन्धमा ०८० मङ्सिर २८ गते बैठक सम्पन्न भएको छ ।
बैठकमा मानव अधिकार समूहले शिक्षा, स्वास्थ्य, वातावरण, महिला हिंसा र सबै प्रकारका समस्याहरूको ध्यानाकर्षण, आगामी रणनीतिक कार्ययोजना सम्बन्धमा बैठक बसेर योजना निर्माण गरेको छ ।
डाक्नेश्वरी नगरपालिका भित्रका समस्याहरू समाधानका लागि विगतमा लिइएको कार्ययोजना विविध रूपमा सम्पन्न गर्ने निर्णय गरिएको सप्तरी सहजकर्ता अजय परियारले जानकारी दिनु भयोे । महिला हिंसा र न्यायबाट वञ्चित व्यक्तिहरूको विषयमा नगर प्रमुख र महिला तथा बालबालिका शाखालाई ध्यानाकर्षणसहित पहल गर्ने, डाक्नेश्वरी नगरपालिका भित्र कुनै पनि ठाउँ वा गाउँ घरमा रहेको समस्या, महिला हिंसा तथा मानव अधिकार र वातावरण संरक्षण अभियान सञ्चालन गर्ने कार्ययोजना बनेको छ ।
डाक्नेश्वरी नगरपालिका मानव अधिकार समूहले कात्तिक १४ गते स्थानीय तहको समस्या पहिचान तथा कार्ययोजना निर्माण बैठकले गरेको निर्णयलाई मानव अधिकार समूहका अध्यक्ष, सम्पूर्ण सदस्य र इन्सेकबाट खटिएको जिल्ला सहजकर्तासहितको टोलीले ०८० पुस ४ गते डाक्नेश्वरी नगरपालिका कार्यालय गएर ध्यानाकर्षण पत्र बुझाऊने निर्णय गरिएको छ ।
कार्यक्रममा डाक्नेश्वरी नगरपालिका मानवअधिकार समूहका अध्यक्ष रामचन्द्र मण्डलले सबै पक्ष मिलेर मानव अधिकार संरक्षण गर्न र मानव अधिकार समूहद्वारा सम्पन्न कार्यको समीक्षा तथा आगामी कार्ययोजना र रणनीति सम्बन्धमा जानकारी प्राप्त गर्न कार्यक्रमको आयोजना गरिएको बताउनु भयो । मानव अधिकार समूहले स्थानीय तहसँग समन्वय गरी शिक्षा, स्वास्थ्य, लैङ्गिक हिंसा, वातावरणको अधिकार तथा जातीय विभेद सम्बन्धी सचेतनामूलक कार्यक्रमसँगै वातावरण र मानव अधिकारको रक्षाका लागि काम गरिरहेको मण्डलले बताउनुभयो ।
