इन्सेकको आयोजनामा नेपाल मानव अधिकार वर्ष पुस्तक २०२० का लागि सङ्कलित घटनाहरूको प्रकाशन पूर्व अर्धवार्षिक समीक्षा असार १८ गते बाजुरामा सम्पन्न भएको छ ।
समीक्षा कार्यक्रममा इन्सेक जिल्ला प्रतिनिधि पदमबहादुर सिंहले ६ महिनाको अवधिमा घरेलु हिंसाका २८, बलात्कारका सात, बालविवाहको एक, हत्याका ६, बहुविवाहका दुई, बलात्कार प्रयासका एकलगायत ५० ओटा घटना प्रस्तुत गरेका थिए ।
घरेलु हिंसाका घटनाहरू मदिरा सेवनका कारण हुने गरेको र सबै यस प्रकृतिका घटनाहरू मिलापत्रमा नै सीमित रहेको प्रतिवेदनमा उल्लेख छ ।
कार्यक्रममा बडिमालिका नगरपालिका–२ का अध्यक्ष डम्बर महतले स्थानीय तहमा निर्माण गरिएका न्यायिक समितिका काममा सुस्तता आएकोले त्यसलाई प्रभावकारी बनाउन नागरिक समाज र इन्सेकले स्थानीय तहमा कानुनी सचेतनासम्बन्धी कार्यक्रम सञ्चालन गर्न आग्रह गरे ।
अन्तरपार्टी महिला सञ्जालकी अध्यक्ष कमलकुमारी शाहले जनप्रतिनिधिहरू नै गैरन्यायिक काममा लागेकोले त्यसको खबरदारीका लागि इन्सेकले भूमिका निर्वाह गर्नुपर्ने बताइन् ।
नेपाल पत्रकार महासङ्घ जिल्ला शाखाका अध्यक्ष प्रकाश सिंहले समाजमा हुने सबै प्रकारका मानव अधिकार विरूद्धका घटना न्यूनीकरणमा राजनीतिक पार्टीहरू पूर्ण रूपमा जिम्मेवार हुने पर्नेमा जोड दिए ।
