अनौपचारिक क्षेत्र सेवा केन्द्र (इन्सेक) को आयोजनामा मकवानपुर जिल्लाको मनहरी गाउँपालिकामा मानव अधिकारको सवाल विषयक कार्यशाला ०८० भदौ २३ गते सम्पन्न भएको छ ।
मनहरी गाउँपालिकामा अधिकार तथा आर्थिक विकास मार्फत महिला सशक्तिकरण कार्यक्रम (रिन्यु परियोजना) अन्तर्गत सञ्चालन भइरहेको कार्यक्रममा मानव अधिकारको सवाल विषयक कार्यशाला इन्सेकले सञ्चालन गरेको हो ।
मनहरी गाउँपालिका-४ मा सञ्चालन गरिएको कार्यशालामा महिला तथा बाल समूहका पदाधिकारी, वडा सदस्यहरू लगायतको सहभागिता रहेको थियो । सहभागीहरूलाई मानव अधिकारसम्बन्धी अवधारणा, मानव अधिकारका सवालहरूका विषय, बालबालिकासम्बन्धी ऐन, २०७५ मा गरिएको कानुनी व्यवस्थाको बारेमा जानकारी दिइएको थियो ।
यसैगरी, दलित, अल्पसङ्ख्यक र अपाङ्गता भएका तथा विपन्न वर्गका बालबालिका शिक्षाको पहुँच भन्दा बाहिर रहेका छन् । बाल हिंसा, दुर्व्यवहार पीडित र अधिकांश बालबालिकाहरूले बिचमै पढाई छोड्ने समस्या रहेको हुँदा उनिहरूलाई विद्यालयमा टिकाउन स्थानीय सरकारको दायित्व र व्यवस्था बारेमा पनि छलफल भएको थियो ।
मानव अधिकारसम्बन्धी पाँचौँ राष्ट्रिय कार्ययोजना लगाएत बालिबालिकाको विकास र निर्णय प्रकृयामा अर्थपूर्ण सहभागिताका लागि समन्वय गर्नु पर्ने स्थानीय तहका सरोकारवाला निकायहरू लगायत बालबालिकाहरूको सहभागिता शिक्षा, स्वास्थ्य र सामाजिक विकासमा गरिनु पर्ने आधारभूत दायित्वका विषयहरूमा कार्यक्रम संयोजक कृष्णप्रसाद नेपालले सहजिकरण गर्नु भएको थियो ।
सहभागीहरूले महिला अधिकार, मानव अधिकार र बालबालिकाको अधिकारलाई प्रवर्धन गर्नको लागि स्थानीय सरकारले चासो दिनु पर्ने धारणा राखेका थिए ।
