अनौपचारिक क्षेत्र सेवा केन्द्र (इन्सेक) द्वारा सञ्चालित मानव अधिकारमैत्री वातावरणका लागि उत्तरदायित्व प्रवर्धन कार्यक्रम अन्तर्गत ०७५ जेठ २६ गते जिल्लाको सबैभन्दा विकट गाउँपालिका खानीखोलाको तालढुङ्गामा सार्वजनिक सुनुवाइ गरिएको छ ।
भूकम्पपीडितको अवस्था र पुनःनिर्माण विषयमा गरिएको भएको सार्वजनिक सुनुवाइमा पीडितहरूले भूकम्पपछिको अवस्थाका विषयमा जानकारी गराएका थिए ।
खानीखोला गाउँपालिका उपाध्यक्ष रुक्मेणी गुरुङले नाम छुटेका भूकम्प पीडितको गुनासोको सुनुवाइ नभएको बताउँदै पहिला एककोठे घरलाई पनि सुविधा दिने भनेकाले सर्वसाधारणले ऋण गरेर घर बनाएको बताइन् ।
उनले गाउँपालिकाभित्र धेरैले नाम छुटेको भनेर गुनासो फारम भरेको भएपनि त्यसको कुनै सुनुवाइ नभएको बताइन् । महिला जनप्रतिनिधि कुमारी बलको अध्यक्षतामा भएको सार्वजनिक सुनुवाइमा शिक्षा विकास तथा समन्वय इकाईका स्रोत व्यक्ति टङ्क थापाले आफ्नो कार्यक्षेत्रमा ३६ वटा विद्यालय क्षति भएकोमा ३० वटा मात्र निर्माणाधीन रहको बताए ।
जिल्ला स्वास्थ्य कार्यालयका अधिकृत सुरेश पासवानले स्वास्थ्य क्षेत्रमा कुनै महामारी नफैलियोस् भन्नेतर्फ आफ्नो कार्यालयको जोड रहेको बताए ।
सहभागीले पुनर्निर्माण सर्वेक्षण छुटेको, नाम ननिस्किएको, एकभन्दा बढी घरधनी भएको, त्रुटीपूर्ण विवरण, जग्गाको स्वामित्व नभएको, जग्गा एकभन्दा बढीको स्वामित्वमा रहेको, कर्मी नपाइएको र ज्यालामा बढोत्तरी भएको, एकल महिलाहको घर बनाउनेतर्फचासो नदिएको, इञ्जिनियर र प्राविधिकले दुःख दिएको जस्ता गुनासो गरेका छन् ।
सार्वजनिक सुनुवाइमा सबै वडाबाट गरी २५ जना जनप्रतिनिधि, १० जना सामाजिक संस्थाका प्रतिनिधि र कार्यालयबाट र ४० जना सर्वसाधारण गरी ७५ जनाको सहभागिता थियो ।
भोजराज तिमल्सिना