अनौपचारिक क्षेत्र सेवा केन्द्र (इन्सेक) नेपालगञ्जको आयोजनामा बाल अधिकार चेतना समूहका सदस्यहरूका लागि दुई दिने क्षमता अभिवृद्धि तालिम असोज ९ गतेबाट पाल्पाको तानसेनमा सुरू भएको छ ।
इन्सेकले सञ्चालन गरेको स्थानीय समुदायलाई सचेत पार्दै जिम्मेवार निकायलाई जबाफदेही बनाउने कार्यक्रम अन्तर्गत बगनासकाली गाउँपालिकाको-७ स्थित खानीगाउँ मावि, दैलातुङ्ग आधारभुत विद्यालय सोही गाँउपालिका-९ स्थित चन्द्र मावि र कालिका आधारभुत विद्यालयमा गठित बाल अधिकार चेतना समूहका सदस्य र संरक्षक शिक्षक, युवा समूहका पदाधीकारीहरूको क्षमता विकास गराउने उद्देश्यले तालिम आयोजना गरिएको इन्सेक प्रदेश ५ कार्यालय, नेपालगञ्जका संयोजक भोला महतले बताए ।
तालिममा इन्सेक अभियान र मानव अधिकार, बाल अधिकार के हो ? नेपालको संविधानमा शिक्षाको अधिकार र बालमनोविज्ञान, बालमैत्री विद्यालय र दण्डरहित शिक्षा, बालभित्ते पत्रिका प्रकाशन, बाल अधिकार प्रवर्धनमा स्थानीय निकायको भूमिका, समस्या पहिचान र आर्थिक कार्ययोजना निर्माणका विषयमा प्रशिक्षण दिइने कार्यक्रम फोकल पर्सन सरस्वती मल्लले बताइन् । दुई दिनसम्म सञ्चालन हुने तालिममा २५ जनाको सहभागिता रहेको छ ।
यज्ञमूर्ति तिमिल्सिना