नेपाल मानव अधिकार वर्ष पुस्तक २०२५ प्रकाशन पूर्व अर्ध वार्षिक समीक्षा कार्यक्रम ०८१ असार १४ गते तानसेनमा सम्पन्न भएको छ ।
कार्यक्रममा इन्सेक पाल्पा जिल्ला प्रतिनिधिले २०२४ को जनवरीदेखि जुनसम्म सङ्कलन गरिएका मानव अधिकार उल्लङ्घनका ३३ ओटा घटना इन्सेकले अभिलेख गरेको जानकारी गराउनुभयो ।
जसमा बालबालिका सम्बन्धी बलात्कारका ६ ओटा, महिला सम्बन्धी बलात्कार चार ओटा, कथित बोक्सी घटनाका एक ओटा, महिला हत्याका एक ओटा र घरेलु हिंसाका २१ ओटा घटना प्रस्तुत गरिएको थियो ।
कार्यक्रममा जिल्ला समन्वय समिति, पाल्पाका प्रमुख टङ्कनाथ खनालले इन्सेकले मानव अधिकारको क्षेत्रमा लामो समयदेखि गहन रूपमा काम गर्दै आएको बताउनु भयो । उहाँले पाल्पामा पछिल्लो समय राष्ट्रिय परिचय पत्र र नयाँ नागरिकता बनाउने कार्यका लागि ज्येष्ठ नागरिकहरूले सास्ती भोग्दै आएकोमा यसतर्फ ध्यान दिइ सरोकारवालाहरूलाई छलफल तथा सहजताको वातावरण मिलाउन इन्सेकलाई आग्रह गर्नुभयो ।
नेपाल पत्रकार महासङ्घ, पाल्पाका अध्यक्ष रेखीराम रानाले यसप्रकारको कार्यक्रमबाट जिल्ला स्तरमा मानव अधिकारको अवस्था र सुधारका लागि हुन सक्ने पहलबारे छलफल हुने मौका मिलेको बताउनु भयो । वरिष्ठ पत्रकार मेघराज शर्माले हरेक ६ महिनामा इन्सेकले गर्ने वर्ष पुस्तक समीक्षा कार्यक्रमबाट जिल्लागत विषयहरू उठान गर्न र समस्याहरूको समाधानमा सहयोग पुग्ने गरेको बताउनु भयो ।
