अनौपचारिक क्षेत्र सेवा केन्द्र (इन्सेक) को आयोजनामा माघ २५ गतेदेखि नेपालको नागरिक समाजको सवलिकरण विषयक दुई दिने अनुशिक्षण कार्यक्रम सुरू भएको छ ।
तालिमको उद्घाटन गर्दै इन्सेकका अध्यक्ष सुबोधराज प्याकुरेलले जिम्मेवारी बहन गरेकाहरू जवाफदेही बन्नुपर्ने बताए । उनले लोकतन्त्र र अराजकता सँगै जान नसक्ने भन्दै अधिकारकर्मी तथा सामाजिक अभियन्ताहरू थप जिम्मेवार भएर लाग्नु पर्ने बताए ।
अध्यक्ष प्याकुरेलले मानव अधिकारको प्रवर्धन र सर्म्बर्द्धनका लागि सबै सरोकारवाला पक्षसँग समन्वय गरेर अघि बढ्नुपर्ने भन्दै प्रभावकारी कार्य सम्पादन गर्नका लागि तथ्यगत सूचना सङ्कलन गर्न आवश्यक रहेको बताए ।
उनले इन्सेक प्रतिनिधिलाई राष्ट्रिय तथा ग्रामीण स्तरमा प्रभावकारी काम गर्दै नमुनाको रूपमा अरूसमक्ष आफ्नो पहिचान स्थापित गराउन सुझाए ।
इन्सेकका कार्यकारी निर्देशक विजयराज गौतमले गैरसरकारी सङ्घसंस्थाबिच समन्वयकारी भूमिका निर्वाह गरी अघि बढ्नुपर्ने बताए । उनले राहत तथा पुनर्निर्माणको विषयमा इन्सेकले अनुसन्धानात्मक तरिकाले प्रभावकारी काम गनुपर्नेमा जोड दिए ।
कार्यक्रममा भूकम्पबाट प्रभावित १४ जिल्लाका इन्सेक प्रतिनिधिहरू, पूर्वाञ्चल, मध्यमाञ्चल र पश्मिाञ्चल क्षेत्रका क्षेत्रीय संयोजकहरू र इन्सेक केन्द्रीय कार्यलयका प्रतिनिधिहरूको सहभागिता रहेको थियो ।
कार्यक्रममा नागरिक समाज र मिडिया निति, जिल्ला स्तरिय नागरिक समाजको पहिचान र समन्वयको अवस्था, परियोजनासम्बन्धी निर्देशिकालगायत समग्र परियोजनाको विषयमा जानकारी गराइने बताइएको छ ।
विवेक ढुङ्गाना