वालिङ नगरपालिका–६ की १८ वर्षीया सीता पाण्डे, सोही नगरपालिका–३ का १७ वर्षीया किशमाया गुरुङलाई इलाका प्रशासन कार्यालय वालिङले घरमै गएर नागरिकता प्रदान गरेको छ । त्यस्तै भिरकोट नगरपालिका–५ का ६७ वर्षीय चोकबहादुर थापालाई नेपाली नागरिकताको प्रतिलिपी प्रदान गरिएको इलाका प्रशासन कार्यालय वालिङका प्रमुख सरिता चापागाई भारीले जानकारी दिनुभयो ।
नागरिकता प्रमाणपत्र नहुँदा उपचार प्रक्रियालगायत आवश्यक सेवा सुविधा लिन कठिनाइ भएको जानकारी आएपछि घरमा गएर नागरिकता प्रदान गरिएको इलाका प्रशासक चापागाईले जानकारी दिनुभयो । नागरिकको दुःखमा साथ दिने प्रशासनको दायित्व भएकाले नै नागरिकले पाउने सेवाबाट बञ्चित हुन नपरोस् भनेर घरमा पुगेको उहाँले बताउनुभयो ।
नागरिकता प्रदान गर्ने सहज व्यवस्था मिलाउन वडा कार्यालयले समन्वय गरेको वालिङ नगरपालिका–६ का वडाध्यक्ष श्यामकृष्ण श्रेष्ठले बताउनु भयो । अशक्तलाई सहज रूपमा कार्यालयसम्म लैजान समस्या भएपछि प्रशासनलाई अनुरोध गरिएको र प्रशासनले पनि सहजीकरण गरेर घरमै आएर नागरिकता दिएको उहाँको भनाइ छ ।