गोरखा फुजेलका कृष्णप्रसाद अधिकारी हत्या प्रकरणका जाहेरवाला व्यक्ति नुरप्रसाद अधिकारीलाई चैत २५ गते चितवन अदालतमा बयानका लागि उपस्थित हुन अदालते आदेश गरे पनि उनी अनुपस्थित रहे ।
अव यस मुद्दालाई के कसरी अघि बढाउने भन्ने विषयमा सोमबार छलफल हुने अदालतका सूचना अधिकारी केशव पौडेलले बताए ।
फागुन १३ गते आइतबार न्यायाधीश कुलप्रसाद शर्माको इजलासले यस मुद्दाका जाहेरवाला नुरप्रसाद अधिकारीलाई बकपत्रका लागि अदालतमा हाजिर हुन आदेश गरेको थियो । मुलुकी ऐन २०२० को अदालती बन्दोवस्तको ११५ अनुसार ‘नबुझी नहुने’ भन्दै नुरप्रसादलाई चैत २५ गते आइतबार अदालतमा बकपत्रका लागि हाजिर हुन आदेश गरेको थियो । गाउँमा फेला नपरेपछि उनको नामको म्याद सार्वजनिक स्थान चौतारामा टाँसिएको थियो ।
विसं २०६१ जेठ २४ गते कृष्णप्रसादका बुबा नन्दप्रसाद अधिकारीले आफ्नो छोराको हत्या भएको भन्दै जिल्ला प्रहरी कार्यालय, चितवनमा उजुरी दिएका थिए । त्यसको १ वर्ष ६ महिनापछि कृष्णप्रसादका दाजु नुरप्रसादले १३ जनाविरूद्ध किटानी उजुरी दिएका थिए । अधिकारीको हत्या ०६१ जेठ २४ गते अपहरणपछि माओवादी कार्यकर्ताले गरेको आरोप छ ।
‘उल्टै’ कारवाही
मुलुकी ऐन अदालती वन्दोवस्तको ११५ नम्बर अनुसार नबुझी नहुने भनिएको व्यक्ति तोकिएको मितिमा उपस्थित नभए उल्टै सजायको समेत व्यवस्था कानुनमा उल्लेख छ ।
पहिलो पटकका लागि ५० रुपियाँ जरिबाना र गिरफ्तार गर्न सकिने व्यवस्था छ । त्यस्तै दोस्रो पटकका लागि बाटोको म्याद बाहेक ७ दिनको लागि समय दिइने र यसमा पनि उपस्थित नभएमा १५ दिनदेखि ४५ दिनसम्मको कैद सजाय फैसला गर्न सकिने ऐनमा उल्लेख छ ।