गएको मङ्सिर १० र २१ गते सम्पन्न निर्वाचनबाट निर्वाचित प्रदेश सभा सांसदलाई माघ ७ गते प्रदेशका अस्थायी मुकाममा पद तथा गोपनियताको सपथ गराइएको छ ।
प्रदेश नम्बर १ को विराटनगरमा, प्रदेश नम्बर २ को जनजकपुरमा, प्रदेश नम्बर ३ को हेटौँडामा, प्रदेश नम्बर ४ को पोखरामा, प्रदेश नम्बर ५ को बुटवलमा, प्रदेश नम्बर ६ को सुर्खेतमा र प्रदेश नम्बर ७ को धनगढीमा नवनिर्वाचित सांसदलाई सपथ गराइएको हो ।
इन्सेक सुर्खेत जिल्ला प्रतिनिधि दुर्गा थापाका अनुसार प्रदेश नम्बर ६ का प्रदेश सभा सदस्यहरूले माघ ७ गते वीरेन्द्रनगरमा सपथ ग्रहण गरेका छन् । प्रदेश प्रमुख दुर्गाकेशोर खनालले प्रदेशसभा सदस्यलाई सपथ ग्रहण गराएका हुन् ।
जिल्ला समन्वय समितिको सभाहलमा प्रदेश प्रमुख खनालले सबैभन्दा पहिले प्रदेश सभा सदस्यहरूमध्ये ज्येष्ठ सदस्य हिमबहादुर शाहीलाई पद तथा गोपनीयताको सपथ गराएका थिए ।
ज्येष्ठ सदस्य शाहीले आफूले सपथ लिए लगत्तै अन्य ३९ जना प्रदेश सदस्यहरूलाई प्रदेश प्रमुख खनालको उपस्थितिमा सपथ ग्रहण गराएका थिए ।
सपथ ग्रहण समारोहमा अधिकांश सांसदहरू आफ्नो मौलिक पोशाकमा सजिएर उपस्थित भएका थिए । प्रदेश सभा सदस्यहरुमध्ये सबैले सपथ लिएका छन् ।
प्रदेश नम्बर ६ का १० जिल्लाबाट २४ जना प्रत्यक्ष र १६ जना समानुपातिक गरी ४० जना सांसद निर्वाचित भएका छन् ।
