“स्थानीय समुदायलाई सचेत बनाउँदै जिम्मेवार निकायलाई जवाफदेही बनाउने ”(इएलपी) परियोजना अन्तरगत भोक्राहा नरसिंह गाउँपालिकामा माघ १६ गते खाद्य अधिकारका सवालमा अन्तरक्रिया कार्यक्रम सम्पन्न भएको छ ।
अनौपचारिक क्षेत्र सेवा केन्द्र (इन्सेक) विराटनगरको आयोजना तथा मानव अधिकार समूह भोक्राहा नरसिंहको संयोजनमा गाउँपालिकामा सरोकारवालाहरूबिच खाद्य अधिकारको सवालमा अन्तरक्रिया कार्यक्रम सम्पन्न भएको हो ।
कार्यक्रममा गाउँपालिका अध्यक्ष महेन्द्रप्रसाद यादवले गाउँपालिकाले कृषि तथा पशु सेवा सम्बन्धी कार्यक्रमलाई प्राथमिकतामा राखेको र थप आकर्षक कार्यक्रम ल्याउने प्रतिवद्धता जनाउनु भयो । उहाँले सशर्त कार्यक्रममा आएको बजेट प्रयाप्त नभएपनि त्यसको लागि थप बजेटसहित कार्यक्रम ल्याउने बताउनुभयो ।
कार्यक्रममा भोक्राहा नरसिंह गाउँपालिका–४ का कार्यवाहक वडाध्यक्ष कैजुम अन्सारीले प्रत्येक वडामा पशु प्रविधिक र कृषिका लागि जेटिएको व्यवस्था गर्नुपर्ने बताउनु भयो । उहाँले उत्पादन भएको कृषि उपजको बजार भाऊ नपाएको, भण्डारण गर्ने ठाउँ नहुँदा लगानी भन्दा कममा विक्रि गर्न बाध्य भएको गुनासो गुर्न भयो ।
कार्यक्रममा सहभागी सुकदेव यादवले उन्नत जातको पशुपालन गर्नुपर्ने र कृषिमा आधुनिकीकरण तथा व्यसायीकरण आवश्यक रहेको बताउनुभयो ।
भोक्राहा नरसिंह गाउँपालिका–६ का वडाध्यक्ष राजेश्वर प्रसाद साहले कृषि र पशु पालनमा ध्यान दिनुपर्ने र आफूहरूले वडाबाट दवाव दिएर भएपनि प्रत्येक वडाका किसानलाई सेवा दिन जेटिएको व्यवस्था गर्ने बताउनुभयो ।
कार्यक्रममा कृषि शाखा प्रमुख रेनुका चौधरीले गाउँमा रहेको रैथाने बालीको संरक्षण गरी जैविक विविधताको संरक्षण गरिनुपर्ने र त्यसको लागि पालिकाले नीति नै बनाउनुपर्ने बताउनुभयो ।
उहाँले कृषिमा माटो परीक्षण नगरी अनाधिकृत रूपमा प्रयोग भएको रसायनिक मल र विषादीले माटोमा असर पारेकाले उत्पादनमा कमी आएको बताउनु भयो ।
कार्यक्रममा पशु शाखा प्रमुख कपिलदेव यादवले पशुका लागि घाँस आवश्यक भएकाले घासमा अनुदान दिनुपर्ने, किसानलाई उन्तत जातको पशुपालनका लागि तालिम दिनुपर्ने र नश्ल सुधार कार्यक्रमलाई व्यापक बनाउनुपर्ने बताउनुभयो ।
पशु अधिकृत मोहमद कलाल कैयुमले उन्नत जातको पशु पालन र आधुनिक कृषि खेती आवश्यक रहेको र त्यसका लागि सरकारको बजेट र निती आवश्यक रहेको बताउनुभयो ।
