नेपाल मानव अधिकार वर्ष पुस्तक २०२१ का लागि जिल्लामा सङ्कलन गरिएका मानव अधिकार उल्लङ्घन तथा ज्यादतीका घटनाहरूको प्रकाशन पूर्व पुस १२ गते सिरहामा वार्षिक समीक्षा गोष्ठी सम्पन्न गरिएको छ ।
इन्सेक सिरहा प्रतिनिधि दुर्गा परियारका अनुसार सन् २०२० को अवधिमा जिल्लामा १ सय १४ ओटा मानव अधिकार उल्लङ्घन तथा ज्यादतीका घटना सङ्कलन गरिएकामध्ये महिला र बालबालिका हिंसाका घटना बढी भएको अभिलेख गरिएको छ ।
कार्यक्रममा प्रस्तुत प्रतिवेदनमा एक वर्षको अवधिमा परिवारजनबाट चार महिलाको हत्या, बलात्कारका घटनामा ३१ बालिका र २१ महिला गरी ५२ जना पीडित भएको तथ्याङ्क प्रस्तुत गरिएको थियो ।
लहान नगरपालिकाका उपप्रमुख सरियारकुमारी चौधरीले इन्सेकको अभिलेखनले सरोकारवालाहरूलाई पनि जिम्मेबार बनाउन सहयोग गर्ने गरेको बताउनु भयो ।
मानव अधिकार संरक्षणमा सबैको भुमिका अपरिहार्य रहेकोले आफ्नो तर्फबाट सबै किसिमको सहयोग गर्ने उहाँको प्रतिबद्धता छ ।
इलाका प्रहरी कार्यालय लहानका डिएसपी शरतकुमार थापा क्षेत्रीले मानव अधिकारको संरक्षणमा प्रहरी नै अग्रपङ्क्तिमा रहने बताउनु भयो ।
प्रहरीको नीति नै अपराधलाई शुन्यमा झार्ने रहेकोले अनुसन्धानको पाटोमा कुनै कसर बाँकी नराखी कानुनले मापन गरेका घटनाहरूमा प्रहरीले मुद्दा दर्ता गरी कारवाही प्रकृया अगाडि बढाउने उहाँले बताउनु भयो ।