नेपाल मानव अधिकार वर्ष पुस्तक २०२० का लागि सङ्कलित घटनाहरूको प्रकाशन पूर्व वार्षिक समीक्षा कार्यक्रम भोजपुर सदरमुकाममा पुस १५ गते सम्पन्न गरिएको छ ।
इन्सेक जिल्ला प्रतिनिधिले सन् २०१९ को जनवरी १ देखि डिसेम्वर ३१ सम्म सङ्कलन गरेका मानव अधिकार उल्लङ्घन तथा ज्यादतीका ७५ ओटा घटना प्रस्तुत गर्नु भयो ।
जसमा बलात्कारका १५ ओटा, बलात्कार प्रयासका नौ ओटा, हत्याका १० ओटा, घरेलु हिंसाका १३ ओटा, कुटपिट तथा गालीगलौजका ७ ओटा, बहुविवाह १० ओटा, गिरफ्तारीका पाँच ओटा र भौतिक संरचना क्षतिका ६ ओटा घटना सार्वजनिक गरिएको छ ।
समीक्षा कार्यक्रममा जिल्ला समन्वय समितिका प्रमुख लक्ष्मण खड्काले मानव अधिकार उल्लङ्घन तथा ज्यादतीका घटनाहरू इन्सेकले सङ्कलन गरेर नेपालको मानव अधिकारको वास्तविक अवस्था देखाएको बताउनु भयो । उहाँले इन्सेकले अबका दिनमा स्थानीय तह सम्म पुगेर पालिकागत हिसाबले तथ्याङ्क सङ्कलन गरे अझै मानव अधिकारको अवस्थाका विषयमा मिहिन ढङ्गबाट जानकारी हुने बताउनुभयो ।
प्रमुख जिल्ला अधिकारी नुरहरी खतिवडाले इन्सेकले सङ्कलन गरेको घटनालाई हेर्दा समाजको चरित्र बिग्रदो अवस्थामा रहेकाले सबै एकजुट भएर समस्या समाधानका लागि लाग्नुपर्ने बताउनु भयो । उहाँले भोजपुर बाहेक अन्य केही जिल्लामा पनि यस्तो कार्यक्रममा सहभागी भएको बताउँदै अझै विश्वासीलो बनाउनको लागि घटनाको गहिराईमा पुग्नु पर्नेमा जोड दिनु भयो ।
जिल्ला प्रहरी कार्यालयका डिएसपी नरबहादुर सलामी मगरले प्रहरी सधैँ मानव अधिकारको क्षेत्रमा लाग्न प्रतिबद्ध रहेको बताउनु भयो । उहाँले जिल्लामा मानव अधिकारको प्रत्याभूतिका निमित्त सुरक्षाको काममा तदारूकताका साथमा लागिरहेको बताउनु भयो ।
मानव अधिकारकर्मी तथा सामुदायिक सेवाकेन्द्र भोजपुरकी अध्यक्ष लीलामाया तामाङले जिल्लामा बालिका तथा महिला बलात्कारका घटना प्रतिदिन बढिरहेकाले यस्ता घटना न्यूनीकरणमा सरोकारवाला सबैको ध्यान जानु पर्ने बताउनु भयो ।
त्यस्तै सञ्चारकर्मी निरोज कैरलाले समुदायमा हुने मानव अधिकारका विषय उजागर गर्न सञ्चारकर्मीको भूमिका महत्वूर्ण हुने भएकाले मानव अधिकारका विषयमा कलम चलाउँदा सम्वेदनशील भएर काम गर्नुपर्ने बताउनु भयो । कार्यक्रममा सहभगीहरूले जिल्लामा सेफ हाउस नहुँदा पीडितको संरक्षणमा समस्या भएकोले यस तर्फ सरकारको ध्यान जान आवश्यक रहेको बताए ।
