जिल्ला समन्वय समिति दैलेखका प्रमुख प्रेमबहादुर थापाले इन्सेकले प्रकाशन गर्ने गरेको नेपाल मानव अधिकार वर्ष पुस्तकमा प्रकाशित घटना नेपालको आधिकारिक मानव अधिकार दस्तावेज भएको बताएका छन् ।
अनौपचारिक क्षेत्र सेवा केन्द्र (इन्सेक)ले नेपाल मानव अधिकार वर्ष पुस्तकको लागि सङ्कलन गरिएका मानव अधिकार हनन् र ज्यादतीका घटनाहरूको आधारमा असार ९ गते दैलेख सदरमुकाममा गरिएको छलफल कार्यक्रममा उनले सो कुरा बताएका हुन् ।
सामाजिक विकृति, विसङ्गति र शोषण दमन अन्त्य गर्न वर्ष पुस्तकको पनि महत्वपूर्ण योगदान रहेको प्रमुख थापाले टिप्पणी गरे ।
प्रमुख जिल्ला अधिकारी लक्ष्मीप्रसाद बास्कोटाले मानव अधिकार हनन्का घटना सार्वजनिक गर्ने क्रमसँगै सरकारको अपराध दुरुत्साहन गर्ने काममा समेत सहयोग पुगेको बताए ।
जिल्ला प्रहरी कार्यालयका डिएसपी ठाकुरप्रसाद पोखरेलले मानव अधिकार वर्ष पुस्तक प्रकाशन निरन्तरताले समाजमा चेतना प्रवाह गर्न र मानव अधिकार हनन् तथा ज्यादतीका घटना र अपराध न्यूनीकरणमा सघाएको बताए ।
कार्यक्रममा जिल्ला अदालत दैलेखका श्रेस्तेदार अधिकृत प्रेमप्रसाद पौडेलले इन्सेकले प्रकाशन गर्ने मानव अधिकार वर्ष पुस्तक र मानव अधिकार प्रवर्धनात्मक प्रकाशनहरूमा अदालती प्रक्रियामा रहेका मुद्दा बारे लेखिने शब्दावलीमा अझै ध्यान दिन आवश्यक रहेको बताए ।
अर्धवार्षिक समीक्षा कार्यक्रममा इन्सेक जिल्ला प्रतिनिधि अमर सुनारले दुई ओटा कुटपिट, बलात्कारका सात ओटा, घरेलु हिंसाका नौ ओटा, बहुविवाहका पाँच ओटा, बालविवाहका दुई ओटा, कथित बोक्सी आरोपको एउटा र जातीय विभेदका घटना तीन ओटासमेत गरी ३५ ओटा घटनाको अभिलेख प्रस्तुत गरेका थिए ।
अमर सुनार