अनौपचारिक क्षेत्र सेवा केन्द्र (इन्सेक) प्रदेश १, कार्यालय विराटनगरको आयोजनामा बाल अधिकार चेतना समूहका सदस्यहरूका लागि दुई दिने क्षमता अभिवृद्धि तालिम इटहरीमा पुस १० गतेदेखि सुरू गरिएको छ ।
इन्सेकद्वारा सञ्चालित स्थानीय समुदायलाई सचेत पार्दै जिम्मेवार निकायलाई जबाफदेही बनाउने कार्यक्रम अन्तर्गत विद्यालयका बाल अधिकार चेतना समूहका सदस्य, संरक्षक शिक्षकहरूको क्षमता अभिवृद्धिका लागि तालिमको आयोजना गरिएको इन्सेक प्रदेश १ का संयोजक सोमराज थापाले बताए ।
तालिममा इन्सेक अभियान र मानव अधिकार, बाल अधिकार, नेपालको संविधानमा शिक्षाको अधिकार र बाल मनोविज्ञान, बालमैत्री विद्यालय र दण्डरहित शिक्षा, बाल भित्ते पत्रिका प्रकाशन, बाल अधिकार प्रवर्धनमा स्थानीय तहको भूमिका विषयमा प्रशिक्षण दिइने कार्यक्रमका फोकल पर्सन बुद्धदेव यादवले बताए ।
तालिममा बाल अधिकार महासन्धि, बालबालिकासम्बन्धी ऐन तथा नियमावलीका बारेमा जानकारी, बाल अधिकार चेतना समूहको जिम्मेवारी तथा योजना निर्माण लगायतका विषयमा प्रशिक्षण केन्द्रीत रहने इन्सेक प्रदेश १ की कार्यक्रम अधिकृत बागमती कट्टेलले बताइन् ।
सरस्वती मावि औरावनी, गढी आधारभुत विद्यलाय भमरी, नेपाल हरि मावि चान्दबेला र मजदुर किसान मावि मधेलीका ३८ जना बालबालिकाको तालिममा सहभागिता रहेको छ ।
तालिममा इन्सेक प्रदेश १ का संयोजक सोमराज थापा, जिल्लास्तरीय मानव अधिकार सञ्जालका संयोजक रमेश भट्टरार्इ, बागमती कट्टेल र जिल्ला प्रतिनिधि जयकृष्ण यादवले सहजीकरण गर्ने फोकल पर्सन यादवले बताए ।
जयकृष्ण यादव