अनौपचारिक क्षेत्र सेवा केन्द्र (इन्सेक) गण्डकी प्रदेश कार्यलय पोखराको आयोजनामा बाल अधिकार चेतना समूहका सदस्यहरूका लागि दुई दिने क्षमता अभिवृद्धि तालिम भदौ १७ गतेदेखि दमौलीमा सुरू भएको छ ।
स्थानीय समुदायलाई सचेत पार्दै जिम्मेवार निकायलाई जबाफदेही बनाउने कार्यक्रम अन्तर्गत म्याग्दे गाउँपालिकामा रहेका विद्यालयहरूमा गठित बाल अधिकार चेतना समूहका सदस्य र संरक्षक शिक्षक तथा प्रधानाध्यापकहरूलाई बाल अधिकारसम्बन्धी विषयमा जानकारी दिन र बालबालिकाको क्षमता विकास गराउने उद्धेश्यले तालिम आयोजना गरिएको इन्सेक गण्डकी प्रदेश कार्यालयका संयोजक शिव खकुरेलले जानकारी दिए । तालिममा ४० जनाको सहभागिता रहेको छ ।
तालिमको उद्घाटन गर्दै प्रमुख जिल्ला अधिकारी भरतकुमार शर्माले तालिममा सिकेका कुरालाई व्यवहारमा उतार्न सुझाए । साथै बालबालिकाको माध्यमबाट समाजमा कुनै पनि कुरा सञ्चार गर्न सहज हुने हुनाले बाल अधिकार चेतना समूहका पदाधिकारीहरूलाई बालबालिकाको हितका कार्यमा सक्रिय बनाउनुपर्नेमा जोड दिए ।
बाल अधिकारको चार वटा सिद्धान्त सबैले पालना गर्न सकेमा बालबालिकाको चौतर्फी विकास हुनेमा प्रजिअ शर्माको जोड थियो । अधिकारको बारेमा मात्र नभई बालबालिकालाई कर्तव्यको बारेमा समेत सिकाउन प्रजिअ शर्माले इन्सेकलाई सुझाव दिए ।
जिल्ला प्रहरी कार्यालयका एसपी सिद्धीविक्रम शाहले संविधानले सुनिश्चित गरेको बालबालिकाको अधिकारबारे प्रत्येक बालबालिका जानकार हुनपर्ने विचार राखे । बालबालिकालाई अपराधबाट जोगाउने दायित्व घरपरिवार, समाज र विद्यालयको भएको हुँदा शिक्षक शिक्षिकाहरू पनि यसतर्फ सजग बन्नु पर्ने एसपी शाहले बताए ।
जिल्ला समन्वय समितिका कार्यक्रम अधिकृत अनिल खनालले सरकारी र गैरसरकारी निकायबिच समन्वय भएमा यस्ता कार्यक्रमहरू फलदायी हुनेमा विश्वास व्यक्त गरे ।
तालिममा इन्सेक परिचय, बाल अधिकार र कर्तव्य, बाल अधिकारको ऐतिहासिक पृष्ठभूमी, बाल अधिकारसम्बन्धी राष्ट्रिय तथा अन्तराष्ट्रिय कानुन, बाल दुव्र्यहवार र जोखिमपूर्ण श्रम, बालमैत्री विद्यालय र दण्डरहीत शिक्षा, विद्यालय तहमा बाल अधिकार र मानव अधिकार शिक्षाको अवधारणा, बालभित्ते पत्रिका र यसको महत्व, कार्ययोजना निर्माण, नेतृत्व र नेतृत्वमा हुनुपर्ने गुण, बालअधिकार चेतना समूहको काम, कर्तब्य र अधिकार तथा वार्षिक कार्ययोजना लगायतको विषयमा प्रशिक्षण दिइने छ ।
प्रकाशचन्द्र भट्टराई