तुलसीपुर उमनपा–११ की ४२ वर्षीया रिता लामिछानेको हत्या गरेको कसुरमा जिल्ला अदालतले तुलसीपुर उमनपा–११ का ३८ वर्षीय टेकबहादुर हमाललाई आजिवन काराबासको सजाय सुनाएको छ ।
जिल्ला अदालतका न्यायाधीश राजेश्वर अर्यालको इजलासले असार ३० गते कसुर ठहर गर्दै हमाललाई आजिवन काराबास र ५ लाख रुपियाँ जरिबाना गर्ने फैसला गरेको अदालतका स्रेस्तेदार दामोदर घिमिरेले जानकारी दिनुभयो ।
हमालले ०८० असोज ६ गते लामिछानेको खुकुरी प्रहार गरी हत्या गरेको भन्दै पीडित पक्षले असोज ६ गते नै इलाका प्रहरी कार्यालय तुलसीपुरमा उजुरी दिएका थिए । शवको पोष्टमार्टम असोज ७ गते राप्ती प्रादेशिक अस्पताल तुलसीपुरमा भएको थियो । प्रहरीले हमाललाई असोज ६ गते घरबाटै गिरफ्तार गरी कात्तिक १२ गते ज्यानसम्बन्धी मुद्दा चलाएको थियो । सोही घटनामा टेकबहादुर हमालले तुलसीपुर उमनपा–११ कै ६५ वर्षीया कमलाकुमारी हमाललाई पनि खुकुरी प्रहार गरी हत्या प्रयास गरेका थिए । टाउकोमा गम्भीर चोट लागेकी हमालको असोज ६ गते नै कोहलपुर मेडिकल कलेजमा उपचार गरिएको थियो ।