बेनी–दरवाङ सडक खण्डमा काम गरेका ३२ जना मजदुरहरुले दुई वर्षदेखि पारिश्रमिक नपाएको भन्दै जिल्ला प्रशासन कार्यालय म्याग्दीमा ज्ञापनपत्र बुझाएका छन् ।
नेपाल बिजुली, पेन्टर, प्लम्बर निर्माण मजदुर युनियन(क्युपेक) नेपाल म्याग्दीका कार्यवाहक अध्यक्ष जितबहादुर किसानको नेतृत्वमा गएको मजदुरहरुको टोलीले ०७९ चैत मसान्तसम्म काम गरेको २१ लाख ६४ हजार २ सय ६५ रुपियाँ नपाएको भन्दै ज्ञापनपत्र बुझाएका हुन् ।
बेनी दरवाङ सडक खण्डको मालिका र रघुगङ्गा गाउँपालिका क्षेत्रमा काम गरेका ३२ मजदुरहरुले उक्त रकम प्राप्त गर्न बाँकी रहेको भन्दै प्रमुख जिल्ला अधिकारी गुरुदत्त ढकाललाई ज्ञापनपत्र बुझाएको बताएका छन् ।
चौरजहारी नगरपालिका–८ रुकुमका ३५ वर्षीय तुलाराम सार्की नेतृत्वमा काम गरेका ३२ जना मजदुरहरुले उक्त रकम नपाएको ज्ञापनपत्रमा उल्लेख छ । ०७९ मङ्सिर १५ गते सम्झौता गरेर चैत मसान्तसम्म काम गरेको १५ लाख ४ हजार ५ सय रुपियाँ रकम मजदुरले पाउन बाँकी रहेको छ ।
त्यस्तै ०७८ वैशाख २३ गतेको सम्झौता अनुसार काम गरेको ५ लाख १७ हजार ९ सय ३१ रुपियाँ र अर्को एउटा सम्झौता बमोजिमको १ लाख ४१ हजार ८ सय ३४ रुपियाँ गरी कुल २१ लाख ६४ हजार २ सय ६५ रुपियाँ पाउन बाँकी रहेको तुलाराम सार्कीको भनाइ छ ।
बिरुवा क्याराभान जेभीका प्रोपाइटर चन्द्र थकालीबाट लिएर मालिका गाउँपालिका–६ दुखुका श्रीप्रसाद रोकाले आफूहरुलाई पैसा दिन पर्ने भए पनि पाउन नसकिएको ज्ञापनमा उल्लेख छ । मालिका गाउँपालिकाका निवर्तमान प्रमुख समेत रहनुभएका रोकाले क्याराभानबाट लिएर दिन्छु भनेको भए पनि क्याराभानबाटै नपाएकोले नदिएको भन्ने गर्नुभएको मजदुरको भनाइ छ ।
क्युपेक नेपालका केन्द्रीय महासचिव राजेन्द्र बिष्ट, सचिव बलादेवी राई, म्याग्दी जिल्ला सचिव पुजा छन्त्याल लगायतको मजदुरहरुको टोलीले प्रशासनमा पुगेर ज्ञापनपत्र बुझाएको थियो ।
प्रमुख जिल्ला अधिकारी गुरुदत्त ढकालले सम्बन्धित पक्षलाई सहजीकरणका लागि पत्र पठाइ सकेको जानकारी दिनु भयो । मजदुरले पारिश्रमिक नपाएको र कम्पनीले पनि आफूले दिनु पर्ने बाँकी रहेको भनेको हुनाले चाँडै सुल्झाउन निर्देशन दिएको उहाँले बताउनु भयो ।