देउमाई नगरपालिकाले सामाजिक सुरक्षा भत्ताका नाममा एकल पुरूष, अविवाहित महिला, लैङ्गिक तथा यौनिक अल्पसङ्ख्य भत्ता, ज्येष्ठ नागरिक पोशाक भत्तालगायत शीर्षकमा बाँड्दै आएको सामाजिक सुरक्षा भत्ता वितरणमा रोक लगाएको छ ।
सामाजिक सुरक्षा भत्ता वितरण नगर्न अख्तियार दुरूपयोग अनुसन्धान आयोगले निर्देशन र सङ्घीय मामिला मन्त्रालयले पत्रपठाएपछि सामाजिक सुरक्षा भत्ता राेकेको नगरपालिकाले जनाएको छ ।
देउमाई नगरपालिकाको आर्थिक वर्ष ०७५-७६ को नगरसभाले एकल पुरूष, अविवाहित महिला (४५ माथि), लैङ्गिक तथा यौनिक अल्पसङ्ख्यकलगायतलाई मासिक रूपमा सामाजिक सुरक्षा भत्ता दिने निर्णय गरेको थियो ।
देउमाई नगरपालिकाले आर्थिक वर्ष ०८०-८१ सम्ममा १ सय ९८ जना एकल पुरूषले २३ लाख २७ हजार रुपियाँ सामाजिक सुरक्षा भत्ता पाएका छन् ।
देउमाईले नगरभित्रका ६० वर्ष पुगेका अविवाहित, पत्नीसँग सम्बन्धविच्छेद भई विवाह नगरेका ६० वर्ष पुगेका र पत्नीको मृत्यु भई अर्को विवाह नगरेका ६० वर्ष पुगेका पुरूषलाई मासिक १ हजार रुपियाँ दरले भत्ता दिँदै आएको थियो ।
देउमाईले आर्थिक वर्ष ०७९-८० मा नगरक्षेत्रका २ सय ७ जना एकल पुरूषलाई २४ लाख ८४ हजार रुपियाँ सामाजिक सुरक्षा भत्ता उपलब्ध गराएको थियो । देउमाईले ‘एकल पुरूष भत्ता वितरण सम्बन्धी कार्यविधि’ पारित गरी एकल पुरूषलाई भत्ता वितरण गरेको लेखा अधिकृत गजेन्द्र एक्तेनले बताउनु भयो ।
आर्थिक वर्ष ०८०-८१ मा ४५ वर्ष पुगेका अविवाहित ९१ जना महिलालाई १० लाख ८९ हजार रुपियाँ सामाजिक सुरक्षा भत्ता प्रदान गरिएको छ । ‘ग’ वर्ग अपाङ्गता भएका ९२ जनालाई ५ लाख ४५ हजार ५ सय रुपियाँ र आर्थिक वर्ष ०८०-८१ मा ‘ग’ वर्ग अपाङ्गता भएका ९२ जनाले ५ लाख ४५ हजार ५ सय रुपियाँ भत्ता पाएका छन् ।
देउमाई नगरपालिका मेयर सूर्यप्रसाद पोखरेलले हाललाई केही भत्ता कार्यक्रम स्थगन गर्ने कार्यपालिका बैठकको निर्णयानुसार अर्को निर्णय नभएसम्मका लागि सामाजिक सुरक्षा कार्यक्रम स्थगन गरिएको बताउनु भयो । सामाजिक सुरक्षा भत्ता पाउँदै आएका लाभग्राहीले सामाजिक सुरक्षा भत्ता नपाएको गुनासो गरेका छन् ।
देउमाई नगरपालिका-३ की ५२ वर्षीया राधिका पराजुली ८९ वर्षीय बाबुको रेखदेख गर्नुहुन्छ । ‘बाबु छोरीलाई महिनादिन तेल खान पुग्दैथियो । बा को भत्ताले चामल, लत्ता कपडा र अन्य खर्च नै ठिक्क हुन्छ ।’ पराजुलीले भन्नुभयो ।
‘महिनामा एक हजार भएपनि दिँदै थियो । नदिने भएछ । नुन खान त पुग्दैथियो ।’ देउमाई नगरपालिका-४ का ६५ वर्षीय हर्कमान राईले भन्नुभयो,‘भत्ता बाड्छ की भनेको त दिँदै आएको पनि नदिने रहेछ ।
‘सामाजिक सुरक्षा कार्यक्रम’अन्तर्गत वितरण गर्दै आएको एकल पुरूष भत्ता, एकल महिला भत्ता (४५ वर्षमाथि), लैङ्गिक तथा यौनिक अल्पसङ्ख्य भत्ता, ‘ग’ वर्ग अपाङ्गता भत्ता र ज्येष्ठ नागरिक पोशाक भत्ता वितरण कार्यक्रम स्थगन भए पनि सुत्केरी स्याहार, दाहसंस्कार र दीर्घरोगी सहयोग कार्यक्रमलाई भने नगरपालिकाले निरन्तरता दिएको छ ।
देउमाईले सुत्केरी स्याहार कार्यक्रम अन्तर्गत ५ हजार रुपियाँ दरले दुई पटकसम्म, दाहसंस्कारमा ५ हजार रुपियाँ र दीर्घरोगीलाई ५ हजार रुपियाँ उपलब्ध गराउँदै आएको छ ।