कर्णाली प्रदेशका मुख्यमन्त्री यामलाल कँडेलले कर्णाली प्रदेश प्राप्तिका लागि भएको आन्दोलनमा ज्यान गुमाएका चार जना सहिदहरूका परिवारलाई चालु आर्थिक वर्षमा रोजगारी दिने प्रतिबद्धता व्यक्त गर्नुभएको छ ।
‘कर्णाली प्रदेशमा रहेका सङ्घीय सरकार र स्थानीय तहलाई पनि आग्रह गर्नेछौँ । प्रदेश मातहतका सबै कार्यालयहरूमा सहिदहरूका तस्वीर राख्ने निर्णय गरिएको छ । सबैले लागु गरौँ’, उहाँले भन्नुभयाे ।
मुख्यमन्त्री कँडेलका अनुसार कर्णाली प्रदेश स्थापना आन्दोलनका क्रममा ज्यान गुमाएका चार जना सहिदको तस्वीर प्रदेशका मन्त्रालय र मातहतका कार्यालयमा अनिवार्य रूपमा राखिने भएको छ । भदौ २ गते बसेको बैठकले उक्त निर्णय गरेको प्रदेश सरकारले जनाएको छ । प्रदेश स्थापनाको आन्दोलनका क्रममा सुर्खेतका गोपालसिंह रजवार, टीकाराम गौतम, यामबहादुर बिसी र जुम्लामा हरिबहादुर कुँवरले ज्यान गुमाएउनु भएकाे थियाे । मन्त्रिपरिषद्ले उनीहरूको परिवारका एक-एक जनालाई रोजगार उपलब्ध गराउने समेत निर्णय गरेको छ ।
प्रदेश प्रमुख यज्ञराज जोशीले सङ्घर्ष र बलिदानबाट प्राप्त कर्णाली प्रदेशको समृद्धि र विकासका विषयमा समीक्षा गर्नुपर्ने बेला आएको बताउनु भयाे । ‘जनताको चाहना र शहीदको सपनालाई कति पूरा गरियो भनेर तीन तहका निर्वाचित जनप्रतिनिधिहरूले समीक्षा गर्नुपर्ने बेला आएको छ’, उहाँले भन्नुभयाे ।
