गाउँमा खानेपानीको समस्या हुँदा एक गाग्री पानी भर्न घण्टौँ पैदल हिँड्नु पर्ने बाध्यता रहँदै आएको मल्लरानी गाँउपालिका-२ का स्थानीयले गुनासो गरेका छन् ।
बस्तीमा पानीको सहज व्यवस्था नहुँदा मल्लरानी गाउँपालिका-२ का सारारा, हमालडाँडा र खजुरे चुदरीखोलाका करिव ६० घर धुरीका नागरिकहरू पानी भर्नको लागि एक घण्टाभन्दा बढी दुरीमा रहेको खोला, कुवा र पँधेरामा जान बाध्य भएका छन् ।
गाउँमा खानेपानीको समस्या वषौँदेखि रहँदै आएको र पानी सहज सुविधा नहुँदा घरयासी काम, मेला पात, सरसफाई गर्न, बालबालिकालाई खाना बनाएर समयमै विद्यालय पठाउन नसेको लगाएतका समस्या भौग्दै आएको स्थानीय ५६ वर्षीया कुवारी नेपालीले बताउनु भयो । निर्वाचनको समयमा राजनीतिक दलका प्रतिनिधिहरूले घर घरमा पानीको सुविधा पुर्याइदिने भने पनि चुनाव जितेपछि यहाँको समस्या के छ भनेर कोही जनप्रतिनिधि गाँउमा नआएको स्थानीय ४८ वर्षीय विकास विष्टले बताउनु भयो ।
गाउँमा पानी आउला र भरपुर उपभोग गर्न पाइएला भन्ने आशा पानीको तिर्खा झै पटक पटक लागिरहन्छ तर आशा वषौँदेखि आशामा रहेको विष्टको भनाई छ । स्थानीयका अनुसार गाउँ नजिक खानेपानीको मुहान नभएकोले टाढाबाट पानी ल्यउँदा खर्च धेरै लाग्ने भएर पनि राज्यले चासो नदएिको गुनासो व्यक्त गरेका छन् । बस्तीमा खानेपानीको समस्या धेरै पहिलेदेखि नै रहँदै आएको र गाउँमा पानी पुर्याउनको लागि डिपीआर पनी बनिसकेकाले बजेट विनायोजन गरी छिट्टै खानेपानीको समस्या हल गर्ने तर्फ गाँउपालिका लागेको मल्लरानी गाँउपालिका अध्यक्ष कृणबहादुर खडकाले बताउनु भयो ।