१६ वर्षीया बालिकालाई बेचबिखन तथा ओसारपसार गरेको कसूरमा घोडाघोडी नगपालिका–१ की ३० वर्षीया लक्ष्मी नेपालीलाई मङ्सिर १२ गते एक वर्ष कैद सजायको फैसला गरिएको छ ।
जिल्ला अदालत, कैलालीका न्यायाधीश ओमप्रसाद अर्यालको इजलासले कसुर ठहर गरी एक वर्ष कैद सजाय र ५ हजार रुपियाँ पीडितलाई क्षतिपुर्ति भराउने फैसला गरेको जिल्ला अदालत, कैलालीका शाखा अधिकृत चेतबहादुर बोहराले बताउनु भयो ।
पीडित बालिकालाई २०७९ चैत १४ गते बेचबिखन तथा ओसारपसार गरेको भन्दै पीडित पक्षले चैत १४ गते जिल्ला प्रहरी कार्यालय, कैलालीमा उजुरी दिनुभएको थियो ।
प्रहरीले सरकारी वकिल कार्यालयमार्फत आरोपित विरुद्ध जिल्ला अदालतमा बेचविखन तथा ओसारपसार अन्तर्गत मुद्दा दर्ता गरेकोमा जिल्ला अदालतले ०८० वैशाख ११ गते पुर्पक्षका लागि थुनामा पठाइएको थियो ।
पीडित बालिकाको स्वास्थ्य परीक्षण ०७९ चैत १४ गते सेती प्रादेशिक अस्पताल, धनगढीमा गरिएको थियो ।