१५ वर्षीया बालिकालाई बलात्कार गरी फरार रहेका आरोपित गोलबजार नगरपालिका–१ का २९ वर्षीय मनोज ठाकुरलाई इलाका प्रहरी कार्यालय गोलबजारले १० वर्ष पछि २०८० असोज २३ गते गिरफ्तार गरेको छ ।
जिल्ला अदालत सिरहाका न्यायाधीश विनोद कुमार पोखरेलले ०७१ साल असोज २७ गते आरोपित मनोज ठाकुर लगायत अन्य दुई जनालाई जनही ११ वर्ष कैद र ५० हजार रुपियाँका दरले क्षतीपूर्ती पीडितलाई दिने गरी फैसला गरेको थियो ।
पीडितलाई साविक गाविस मुक्सार–६ हाल गोलबजार नगरपालिका–१ का १८ वर्षीय नजामुदिन अली, १९ वर्षीय मनोज ठाकुर र १९ वर्षीय दाउद अलीले ०७० पुस ६ गते सामूहिक बलात्कार गरेका थिए । बलात्कार पछि स्थानीयहरूले गाउँमै घटना मिलाउन खोजे पनि पीडित परिवारले पुस १२ गते जिल्ला प्रहरी कार्यालयमा उजुरी दिएका थिए । पीडितको स्वास्थ्य परीक्षण जिल्ला अस्पताल सिरहामा पुस ११ गते भएको थियो ।
जिल्ला प्रहरी कार्यालय सिरहाले आरोपित नजामुदिनलाई पुस ११ गते गिरफ्तार गरेको थियो । तर, अन्य दुई आरोपितहरू फरार रहेका थिए । जिल्ला अदालतले ०७० माघ ९ गते आरोपित नजामुदिनलाई पुर्पक्षका लागि थुनामा राख्ने आदेश दिएको थियो भने पुनरावेदन अदालत राजविराजले ०७० साल फागुन २९ गते नजामुदिनलाई तारेखमा राख्ने आदेश दिएको थियो ।
सिराहा जिल्ला अदालतका तत्कालीन न्यायाधीश विनोद कुमार पोखरेलले ०७१ साल असोज २७ गते घटनामा संलग्न तीनै जना आरोपितहरूलाई दोषी ठहर गर्दै कैद सजाय र जरीवाना गरे पनि आरोपितहरू फरार रहेका थिए । घटनामा संलग्न अन्य दुई आरोपितहरू अझै फरार रहेकोले खोज तलास भइरहेको जिल्ला प्रहरी कार्यालयका डिएसपी रविन्द्रराज पाण्डेले बताउनु भयो ।