विराटनगर महानगरपालिका-५ जामुनगाछीकी ५३ वर्षीया सुशासन अभियन्ता इन्दिरा चापाँगाईँ गिरफ्तारी घटनामा इन्सेकले चासो व्यक्त गरेको छ ।
इन्सेक कोशी प्रदेश कार्यालय, विराटनगरका प्रदेश संयोजक सोमराज थापा नेतृत्वको मानव अधिकारकर्मीको टोलीले जिल्ला प्रहरी कार्यालयको हिरासतमा रहनु भएकी चापाँगाईलाई साउन २३ गते भेटी घटनाका विषयमा जानकारी लिएको छ ।
विराटनगर महानगरपालिकाका मेयर नागेश कोइरालाले अभियन्ताविरूद्ध ०८० साउन १५ गते जिल्ला प्रहरी कार्यालयमा अभद्र शीर्षकमा निवेदन दिएपछि चापाँगाईलाई सोही दिन प्रहरीले गिरफ्तार गरी हिरासतमा राखेको छ ।
अनुसन्धानका लागि गिरफ्तार भइ प्रहरी हिरासतमा रहनु भएकी अभियन्ता चापाँगाईलाई भेटी उहाँको माग र घटनाका विषयमा जानकारी लिएको इन्सेक कोशी प्रदेश संयोजक सोमराज थापाले बताउनु भयो ।
जिल्ला प्रहरी कार्यालयका एसपी दीपक पोखरेलसँग भेटी घटनाका विषयमा जानकारी लिएको संयोजक थापाले बताउनु भयो ।
अधिकारकर्मीसँगको भेटमा एसपी पोखरेलले अभियन्ताका विषयमा महानगरपालिकाबाट निवेदन आएपछि अनुसन्धानका लागि गिरफ्तार गरेको बताउनु भयो । एसपी पोखरेलले अभियन्ताले उठाएको विषयमा अधिकारकर्मीले चासो दिएकाले समस्या समाधानका लागि सहयोग गर्ने बताउनु भयो ।
घटनाका विषयमा अधिकारकर्मीको टोलीले साउन २३ गते विराटनगर महानगरपालिकाका मेयर नागेश कोइरालासँग भेट गरी घटनाका विषयमा जानकारी लिनुका साथै चासो व्यक्त गरेको छ ।
अधिकारकर्मीसँगको भेटमा मेयर कोइरालाले विरोध गर्न पाउनु अधिकार भएपनि मेयर लक्षित गाली र तुच्छ वचनका कारण प्रशासनमा उजुरी दिएको बताउनु भएको छ ।
विराटनगर महानगरपालिका कार्यालयले चापागाईंवरिुद्ध ०८० साउन १५ गते अभद्र व्यवहार मुद्दामा जिल्ला प्रहरी कार्यालयमा उजुरी दिएपछि प्रहरीले अनुसन्धानका लागि चापाँगाईलाई गिरफ्तार गरी हिरासतमा राखेको इन्स्पेक्टर पप्पु नायकले बताउनु भयो ।
प्रहरीले जिल्ला अदालतबाट म्याद थप गरी अनुसन्धान गरेकोमा साउन २१ गते म्याद सकिएछि पुन साउन २२ गते आठ दिन म्याद थप गरी घटनाका विषयमा अनुसन्धान गरिरहेको छ ।
सुशासन अभयिान्ता चापाँगाईले जिल्ला प्रशासन कार्यालय मोरड्गमा गोग्राह कलेज विराटनगर र सोही कलेजको सञ्चालक समितिविरुद् ०८० जेठ १८ गते निवेदन दर्ता गराएर आन्दोलन गर्दै आउनु भएको थियो ।
विराटनगर महानगरपालिका अगाडि गएको जेठ महिनायता मेयरविरुद् विरोध गर्दै आउनु भएको अवस्थामा चापाँगाईलाई प्रहरीले गिरफ्तार गरी हिरासतमा राखेर अनुसन्धान गरिरहेको छ ।
पूर्वाञ्चल विश्वविध्यालय एन र २०५७ सालको सक्कली लिखित कागजात जुटाई प्रमाणति गर्न र गोग्राह सामुदायिक कलेजले सोही नामको निजी कलेज सञ्चालन गरेकोमा महानगरपालिकाले निजी कलेजलाई ५ लाख रुपियाँ आर्थिक सहयोग गरेकोमा सुशासन अभियन्ता चापाँगाईको विरोध छ ।
विराटनगर महानगरपालिका-४ स्थित गोग्राहा स्कुलमा सञ्चालित कलेज निजी क्षेत्रबाट सञ्चालनमा रहेको र सो कलेजलाई विराटनगर महानगरपालिकाले ५ लाख रुपियाँ आर्थिक सहयोग आरोप लगाउँदै चापागाई उक्त रकम महानगरपालिकालाई फिर्ता हुनुपर्ने माग राख्दै आन्दोलनमा उत्रिनु भएको छ ।
