बालमैत्री माध्यमद्धारा पठनपाठन गराउन सरकारले एक विद्यालय एक बालविकास केन्द्र सञ्चालनमा ल्याएको भए पनि भिमदत्त नगरपालिका क्षेत्रमा सञ्चालित बालविकास केन्द्रका शिक्षिकाहरुले विगत १० महिनादेखि तलब सुविधा पाउन सकेका छैनन् ।
सामुदायिक विद्यालयमा कार्यरत बालविकास शिक्षिकाहरूलाई संघ र स्थानीय सरकारले तलब सुविधा उपलब्ध गराउनु पर्ने व्यवस्था अनुसार संघीय सरकारबाट पाउनु पर्ने मासिक १० हजार तलब सुविधा पाउने गरेका भए पनि स्थानीय तहले उपलब्ध गराउनु पर्ने मासिक ७ हजार रुपियाँ तलब सुविधा पाउन नसकेको बालविकास केन्द्रका शिक्षिकाहरुले गुनसो गर्नु भएको छ ।
भिमदत्त नगरपालिका भित्र रहेका ५७ ओटा सामुदायिक विद्यालयमा १ सय ४४ जना बालविकास शिक्षिका कार्यरत रहको र उहाँहरुले स्थानीय तहबाट उपलब्ध गराउनु पर्ने मासिक ७ हजार तलब सुविधा विगत १० महिनादेखि पाउन नसकेको बालविकास शिक्षा सुदूरपश्चिम प्रदेशका उपाध्यक्ष रमा पन्तले बताउनु भयो ।
पटक–पटक नगरपालिकासँग समन्वय गर्दा समेत नगरपालिकाले आफूसँग बजेट नभएको भनेर जिम्मेवारीबाट पन्छिने गरेको उहाँले बताउनु भयो ।
सरकारले बालविकास शिक्षिकाहरूको हौसला बढाउन समयमै तलब तथा अन्य सुविधा दिनु पर्नेमा उल्टै मासिक पारिश्रमिक नै नदिएर शिक्षिकाहरूको मनोबल घटाउने कार्य सरकारले गरिरहेको शिक्षिका लक्ष्मी पाण्डेयले बताउनु भयो ।
१० महिनासम्म तलब नपाएर विद्यालयमा पढाउनु पर्दाको कठिनाई र यसले शिक्षण सिकाईमा पार्न सक्ने असरलाई मध्यनजर गर्दै स्थानीय सरकारले मामिक पारिश्रमिक तलब उपलब्ध गराउनु पर्ने शिक्षिका पाण्डेयको भनाइ छ ।
समयमा तलब नपाउँदा घरभाडालगायत आफ्नो दैनिकीमा समस्या परेको शिक्षिका विन्दु विष्टले दुखेसो पोख्नु भयो ।
एउटै विद्यालयमा कार्यरत अरू शिक्षकहरूले नियमित तलब पाउने तर बालविकासका शिक्षिकाहरूले तलब नपाउँदा आफूहरुको श्रमको अपहेलना गरेको अनुभूति भएकोे शिक्षिका भुवनेश्वरी जोशीले दुखेसो पोख्नु भयो ।
छोराछोरी पढाउनेदेखि लिएर घर खर्च, घरको ऋण सबै तलब मै भर पर्ने हुनाले लामो समयदेखि तलब नपाउँदा जिवन धान्न सकस् भएको उहाँको भनाइ छ ।
अन्य शिक्षकहरूले नियमित रूपमा तलव तथा चाडपर्वका बेला पेश्की रकम समेत पाउने गरेको भए पनि आफूहरुले मासिक पारिश्रमिक समेत पाउन नसकेको शिक्षिका दुर्गा विष्टले गुनासो गर्नु भयो ।
उहाँले भन्नु भयो– ‘विगतका वर्षमा पनि दशैको मुखैमा आन्दोलन गरेरै तलब पाएका थिएउ । यस वर्षको महान पर्व तिज आउन केहि दिन मात्रै वाँकी छ । तर, हामीले १० महिनादेखि तलब नै पाएका छैनौँ । कसरी चाँडपर्व मनाउने । घर खर्च चलाउने । चिन्ताले सताउने गरेको छ । स्थानीय तहले चाडपर्वको समयमा ६ महिनाको तलब भए पनि दिने वातावरण बनाइ दिनु पर्छ ।’
भीमदत्त नगरपालिकाका प्रवक्ता महेन्द्र खड्काले बजेट अभावका कारण समयमै तलब निकासा गर्न नसकिएको र यस आर्थिक वर्षको भदौ वा असोज महिनासम्म सबै जनाको तलब उहाँको बैङ्क खातामा पठाउन सकिने बताउनु भयो ।