हिमाली जिल्ला हुम्ला हालसम्म पनि राष्ट्रिय सडक सञ्जालमा नजोडिदा बिरामीलाई दुईदिन बोकेर सदरमुकामस्थित जिल्ला अस्पताल पुर्याउनु पर्ने बाध्यता हुम्लाबासीको अझै हट्न सकेको छैन ।ग्रामिण क्षेत्रका स्वास्थ्य संस्थामा दक्ष स्वास्थ्यकर्मी र औषधि नहुँदा बिरामीले सास्ती खेप्नुपर्ने बाध्यता हुम्लाबासीको छँदैछ । त्यसमा पनि स्वास्थ्य संस्थामा औषधि नभएपछि यहाँका बिरामीले अकालमै ज्यान फालेका उदाहरण प्रशस्तै छन् ।
सर्केगाड गाउँपालिका–३ उनपानी गाउँ निवासी ४२ वर्षीय गोर्ख फडेराको असोज ४ गतेदेखि दिसापिसाब बन्द भयो । पशु चौपायको हेरालाको रुपमा गुँसा लेखमा बस्दै आउनु भएका बिरामी फडेर एक्कासी बिरामी पर्दा गाउँमा ल्याउन कठिन भएको आफन्त छिरिङ फडेराले गुनासो गर्नु भयो । आफन्त पडेराका अनुसार उनपानी आधारभूत स्वास्थ्य इकाईमा असोज ४ गतेनै उपचारका लागि लगियो तर त्यहाँ नत औषधि पाइयो नत दक्ष स्वास्थ्यकर्मी नै भेटिए । दुईदिनदेखि दिसापिसाब रोकिएको समस्याले थला परेका बिरामी फडेरालाई स्वास्थ्य संस्थामा औषधि नभईसकेपछि सोही दिन रिफर गरियो आफन्त फडेराले गुनासो गर्नु भयो । बिरामी फडेराका भतिज सत्य फडेराले भन्नु भयो राष्ट्रिय सडक सञ्जाल नजोडिएकै कारण हामीले यस्तो दुःखकष्ट भोग्नु पर्ने अवस्था आएको छ । सर्केगाड गाउँपालिकादेखि सिमकोटसम्म सडक निर्माण कार्य कहिले सम्पन्न भएर गाडीमा आवातजावत गर्न पाइने हो उहाँले थप्नु भयो । सदरमुकाम सिमकोटमा सडक जोडिन अझैँ दुईदेखि तीन वर्ष लाग्ने स्थानीयले गुनासो गर्दै आएका छन् ।
बिरामी फडेरालाई स्टेचरमा बोकी दुईदिन लगाएर असोज ६ गते जिल्ला अस्पतालमा पुर्याएपनि उपचार सम्भव नभएपछि बिरामीलाई सोहीदिन जिल्ला बाहिर नेपालगञ्ज मेडिकल कलेजमा रिफर गरियो आफन्त फडेराले बताउनु भयो । सडक अवरुद्ध भएका कारण गाउँबाट ६ जनाले पालैपालो गरेर बिरामी बोक्दा कष्ठपूर्ण अवस्थामा सिमकोट पुर्याएको आफन्तले गुनासो गर्नु भयो । लामो समय जिल्ला अस्पतालमा औषधि नहुनुमा नियमित हवाई उडान नभएकै कारण जिल्ला बाहिरबाट औषधि आयात हुन नसकेको स्वास्थ्य सेवा कार्यालय, हुम्लाका प्रमुख प्रेमबहादुर सिंहले बताउनु भयो । उहाँले भन्नु भयो विद्युत अवरुद्ध नभएको भए सामान्य बिरामीलाई भने जिल्ला बाहिर रिफर गर्नुपर्ने थिएन ।
