आर्थिक अवस्था कमजोर भएर न्यायिक प्रक्रियामा जान समस्या भएका दुुईजना घरेलु हिंसा पीडितलाई अनौपचारिक क्षेत्र सेवा केन्द्र (इन्सेक) कर्णाली प्रदेश कार्यालय, सुर्खेतले असोज ७ गते आर्थिक सहयोग गरेको छ ।
गुुर्भाकोट नगरपालिका–१३ की ४४ वर्षीया मिना सार्कीलाई १० हजार तथा वीरेन्द्रनगर नपा–२ की ३५ वर्षीया पीडित डिलु दमाईलाई पाँच हजार रुपियाँ इन्सेकले आर्थिक सहयोग गरेको हो ।
पीडितलाई न्याय प्रक्रियामा जाँदा आइपर्ने निवेदन शुल्क, फोटोकपी, यात्रा खर्च लगायत विभिन्न आर्थिक समस्यालाई सहयोग पुग्ने उद्देश्यले उक्त रकम सहयोग गरिएको इन्सेक कर्णाली प्रदेशका संयोजक नारायण सुवेदीले बताउनुु भयो ।
मानव अधिकार सहायता कक्षको भदौ २२ गते बैठक बसि पीडितलाई आर्थिक सहयोग गर्ने निर्णय अनुसार उहाँहरूलाई सहयोग गरिएको संयोजक सुवेदीले बताउनुुभयो ।
यो महिनामा मात्र कार्यालयले आर्थिक अवस्था कमजोर भएका तीन जना पीडितलाई आर्थिक सहयोग गरेको छ । २०२२ जनवरीदेखि हालसम्म कार्यालयले १२ जना पीडितलाई आर्थिक सहयोग गरेको इन्सेकका कार्यक्रम संयोजक किरण पौडेलले जानकारी दिनु भएको छ ।
पीडित मिना सार्कीको पतिले ०७९ साउन २१ गते घरमा तातो पानी उमालेर शरीरमा खल्याइदिएका थिए । उनको प्रदेश अस्पतालमा उपचार पश्चात अहिले अवस्था सामान्य छ । पीडित डिलुदमाईको पतिले पटक पटक शारीरिक तथा मानसिक यातना दिदै आएको पीडितले बताउनु भएको छ ।
इन्सेकको पहलमा मिना सार्कीले सम्बन्ध विच्छेद, अंश र खाना खर्च भराई पाउँ भनि ०७९ भदौ ८ गते जिल्ला अदालतमा मुद्दा दिनु भएको छ । डिलु दमाईले सम्बन्ध विच्छेदको मुद्दा असार ५ गते जिल्ला अदालतमा दर्ता गराउन भएको छ ।
