भिमदत्त नगरपालिका–१५ गोबरैयाकी ४५ वर्षीया प्रेमलता चन्दलाई कुटपिट गरी घर निकाला गरेको आरोपमा प्रहरीले ५४ वर्षीय पति विरेन्द्र चन्दलाई भदौ २० गते गिरफ्तार गरेको छ ।
पीडित महिलाले आफूलाई कुटपिट गरी घाइते बनाएको र घर निकाल समेत गरेको भन्दै भदौ १९ गते जिल्ला प्रहरी कार्यालयमा उजरी दिएकोले आरोपितलाई गिरफ्तार गरी अनुसन्धान भइरहेको जिल्ला प्रहरी कार्यालयका इन्स्पेक्टर लोकेन्द्र ठकुन्नाले इन्सेक प्रतिनिधिसँगको फोन सम्पर्कमा बताउनु भयो ।
भदौ १८ गते बाँसको लठ्ठीले मरणासन्न हुने गरी कुटपिट गरी गम्भिर घाइते बनाएपछि पति विरुद्ध जिल्ला प्रहरी कार्यालयमा उजुरी दिएको पीडित महिलाले इन्सेक प्रतिनिधिसँगको भेटमा बताउनु भयो ।
उहाँले भन्नु भयो– ‘लामो समयदेखि पटक पटक कुटपिट गर्ने, हातपात गर्र्ने, अपशब्द प्रयोग गरी शाररीक तथा मानसिक यातना दिने गर्नु भयो । यस पटक सहन सकिने । बाध्य भएर न्यायका लागि प्रहरीमा उजुरी दिए ।’
कुटपिटबाट गम्भिर घाइते हुनु भएकी महिलाको स्वास्थ्य उपचार भदौ १९ गते महाकाली अस्पतालमा गरिएको थियो ।
कुटपिट गरी घर निकाल समेत गरिएकी पीडित महिलालाई हाल जानकी टोलस्थित अल्पकालिन सेवा केन्द्रमा आश्रय दिइएको सेवा केन्द्रका संयोजक मञ्जु केसीले बताउनु भयो ।