कर्णाली स्वास्थ्य विज्ञान प्रतिष्ठान शिक्षण अस्पताल जुम्लाको आकस्मिक विभागमा कार्यरत चिकित्सक करण साहमाथि कुटपिट भएको घटनामा संलग्न कर्मचारी धनबहादुर शाही निलम्बनमा परेका छन् ।
प्रतिष्ठानको भदौ ४ गते बसेको कार्यकारी परिषद्को बैठकले शाहीलाई निलम्बन गरेको हो । उहाँलाई ४५ दिनको लागि निलम्बित गरिएको हो ।
कार्यकारी परिषद्को बैठकले अस्पतालका निर्देशक डा. पुजन रोकायाको संयोजकत्वमा तीन सदस्यीय छानबिन समिति गठन गरेको रजिष्टार नृपेन्द्र महतले बताउनु भयो । उहाँले भन्नुभयो समितिमा डा. पुजन रोकाया, डा. अनुपमंगल समाल र प्रतिष्ठानका कानुनी सल्लाहकार मीनबहादुर महत रहेका छन् । समितिले ३० दिनभित्र प्रतिवेदन पेस गर्ने समय दिइएको छ ।
चिकित्सक कुट्ने कर्मचारी शाही कर्णाली स्वास्थ्य विज्ञान प्रतिष्ठानको प्रशासन तर्फको चौथो तहको कर्मचारी हुन् ।
शाहीले भदौ २ गते आकस्मिक विभागमा आफ्नो छोराको टाका निकाल्न डाक्टर साहसँग आग्रह गरेका थिए । उक्त विषयमा भएको विवादका कारण शाहीले चिकित्सक साहलाई आक्रमण गरेका थिए । शाहीले चिकित्सकलाई हातले र खुट्टाले कुटेको आरोप छ ।
शाहीले डाक्टरलाई हानेको सीसीटिभीको फुटेज अहिले सामाजिक सञ्जालमा भाइरल बनेको छ । डा. साह माथिको आक्रमण प्रति विरोध जनाउँदै कर्णाली स्वास्थ्य विज्ञान प्रतिष्ठानका स्वास्थ्यकर्मी तथा चिकित्सकहरूले कडा सुरक्षाको मागगर्दै आन्दोलन थालेका छन् ।
उनीहरूले हातमा कालोपट्टी बाँधेर काम गरेका छन् । यसैगरी भदौ ५ गते आईसियु, इमरजेन्सी र एनआईसियु सेवा बाहेक सबै सेवा बन्द गरेका थिए भने अरु दिन सुरक्षाको अनुभूति र घटनामा संलग्न व्यक्तिलाई कारबाही नहुँदासम्म पेन डाउन कार्यक्रम गर्ने जनाएका छन् ।
चिकित्सकहरूको दबाब पछि कार्यकारी परिषद्को बैठक बसेर तत्काल छानबिन समिति गठन गरेर अनुसन्धानको प्रक्रिया अघि बढाइएको रजिष्टार महतले बताउनु भयो ।
छानबिन समितिको प्रतिवेदनको मर्म अनुसार थप कारबाही अघि बढ्ने उहाँले बताउनु भयो । उहाँले अस्पतालका कर्मचारीले चिकित्सक माथि गरेको आक्रमणको घटनाले प्रतिष्ठानलाई थप गम्भीर बनाएको जानकारी दिनुभयो । कुट्ने कर्मचारीविरुद्ध जिल्ला प्रहरी कार्यालय जुम्लामा भदौ २ गते उजुरी परेपछि घटनाका आरोपितलाई सोही दिन प्रहरीले गिरफ्तार गरेको छ । शाहीको कुटपिटबाट डा. साहको टाउको र पेटमा चोट लागेको छ ।
भदौ २ गते बिहान ९ बजे प्रतिष्ठान प्रशासनतर्फका चौथो तहका कर्मचारीसमेत रहेका शाही छोराको टाका काट्न भन्दै इमरजेन्सी विभागमा पुगेका थिए । तत्कालका लागि बिरामी हेर्न व्यस्त रहेको जनाउँदै डा. साहले बिहान ११ बजेतिर टाका काटिदिने प्रतिक्रिया दिए । शाहीको छोराको टाका काट्ने विषयमै उनीहरूबीच विवाद हुँदा शाहीले हातपात गरेको नेपाल चिकित्सक सङ्घ जुम्ला शाखाका उपाध्यक्ष डा. कमल थानीले जानकारी दिनुभयो ।
‘बिहानपख इमरजेन्सी वार्डमा बिरामीको भिडभाड नै थियो । चिकित्सकले बच्चाको घाउ पाकीसकेको छैन । हतार नगर्नुस् । अहिले म बिरामीसँग छु । ११ बजेतिर भेटेर हेरौंला भन्नुभएको सुनियो,’ उपाध्यक्ष डा. थानीले भन्नुभयोे, ‘शाही त मेरो काम नगरेको भन्दै डाक्टर माथि हातपातमा उत्रिएछन् । यो राम्रो काम कदापी होइन् । यो कार्यले सिंगो प्रतिष्ठानका चिकित्सक र स्वास्थ्यकर्मी नै कर्मचारीबाट असुरक्षित हुनुपर्ने अवस्था आयो ।’
डा. साहले आफूमाथि हातपात गरेको भन्दै जिल्ला प्रहरी कार्यालयमा उजुरी दिएका छन् । उजुरी उपर प्रहरीले अनुसन्धान भइरहेको जनाएको छ ।
कर्णाली स्वास्थ्य विज्ञान प्रतिष्ठानका डिन तथा प्रवक्ता डा. रमेश भट्टराईले कर्मचारीले चिकित्सकलाई कुटेको बताउनु भयो । उहाँले भन्नुभयो, कर्मचारीले चिकित्सकमाथि हात हाल्न नहुने हो । हात हालिसकेपछि समस्या भयो ।’ डा. साह डिउटीमा भएको बेला हातपात गर्ने होइन ।अलिअलि धकेलाधकेल भए पनि समाधान गर्न सकिन्थ्यो होला । उहाँले थप्नुभयोे, ‘सीसीटीभी फुटेजमा स्पष्टरुपमा चिकित्सकमाथि हातपात भएको देखिन्छ ।’ पीडित चिकित्सकले निवेदनसँगै सीसीटीभी फुटेज नै प्रहरी र प्रशासन कार्यालयमा पेस गरेका छन् । चिकित्सकले काम गर्न सक्दैनौं, इमरजेन्सी बाहेकका सेवा बन्द गर्ने चेतावनी दिएको प्रवक्ता भट्टराईले जानकारी दिनुभयो ।
घटनाका आरोपित कर्मचारी शाहीले चिकित्सक कुटिएको विषय सत्य नभएको प्रतिक्रिया दिनु भएको छ । ‘मेरो बच्चाको पेट दुखेर छटपटिएको थियो । सँगै टाका काट्नुपर्ने पनि थियो । तर त्यसका लागि एक घण्टा कुर्दा पनि उपचार नभएपछि केही प्रशासनिक कर्मचारीको सहयोगमा पुनः उपचारको लागि अनुरोध गरे तापनि बारम्बार बाहिर पठारहनुभयो । यदि इमर्जेन्सीमा भिड भएको भए पनि म गल्ती हुन्थे । सीसी क्यामरा हेर्नुस् इमर्जेन्सीमा त्यो समयमा एक जना पनि बिरामी थिएन । तापनि उहाँले निकै नै आडम्बर देखाएपछि सामान्य धकेलाधकेल भएको हो । सायद जोकोही पनि यस्तै गर्थे किनकी ६ वर्षको बच्चा छट्पटिरहँदा कति मन दुख्छ ।’