आगोले पोलेर घाइते भङ्गहा नगरपालिका–९ की ३५ वर्षीया प्रमिला सदाको उपचारका क्रममा कीर्तिपुरस्थित बर्निङ अस्पतालमा साउन २९ गते राति मृत्यु भएको छ ।
सदालाई रामगोपालपुर नगरपालिका–८ का ३८ वर्षीय पति शङ्कर सदाले शरीरमा मट्टीतेल छर्केर आगो लगाएपछि घाइते बनाएको आरोप छ ।
भङ्गहा नगरपालिका–९ कञ्चनवनस्थित माइतीघरमा आमासँगै सुतेकी प्रमिलालाई आरोपितले साउन २१ गते राति मट्टीतेल खन्याएर आगो लगाएको आरोप छ ।
धनुषाको महेन्द्रनगरस्थित एक पसलबाट ४० रुपियाँमा मट्टीतले किनेर पत्नी प्रमिला सदाको शरीरमा खन्याएर आगो लगाएपछि पीडितको शरीरको ७० प्रतिशत भाग जलेको अस्पतालले जनाएको थियो ।
प्रमिलासँगै सुतेकी ६५ वर्षीया आमा रेशमा देवी सदाको शरीरको १० प्रतिशत भाग जलेको छ । घाइते दुवै जनाको उपचार काठमाडौँको कीर्तिपुर अस्पतालमा भइरहेको थियो ।
उपचारको क्रममा साउन २९ गते राति प्रमिला सदाको मृत्यु भएको भतिज ललित सदाले जानकारी दिनु भयो ।
आरोपित शङ्कर सदालाई नेपाल–भारतको सीमावर्ती क्षेत्रमा पर्ने महोत्तरीको सम्सी गाउँपालिका–६ स्थित सम्सी–कन्हवा स्थित नेपाल क्षेत्रबाटै साउन २५ गते गिरफ्तार गरिएको जिल्ला प्रहरी कार्यालय महोत्तरीका डिएसपी प्रकाश विष्टले बताउनु भयो ।
यस सम्बन्धमा थप अनुसन्धान भइरहेको जिल्ला प्रहरी कार्यालय महोत्तरीले जनाएको छ ।