जुम्लाको पूर्वी भेगमा पर्ने पातारासी गाउँपालिकामा–३ हुरीमहरीमा रहेको सरस्वती आधारभूत विद्यालयको भवन भत्किँदा चार जना विद्यार्थी घाइते हुनुका साथै पठनपाठन प्रभावित भएको छ ।
कक्षा सञ्चालन भइरहेको समयमा साउन २२ गते विद्यालय भवन भत्किएपछि विद्यार्थी घाइते भएका हुन् । शिक्षक डिल्ली बुढाका अनुसार घाइते हुनेमा कक्षा ३ र ४ का विद्यार्थी रहेका छन् । घाइते मध्ये ११ वर्षीया मुनकली बुढा र १० वर्षीया सुस्तिका बुढालाई बढी चोट लागेको थियो । भवन निकै पुरानो र जीर्ण भएको थियो । विद्यालयको तीन कोठे भवन भत्किएको उहाँले बताउनु भयो । उहाँले भन्नुभयो घाइते विद्यार्थीको स्थानीय स्वास्थ्य संस्थामा उपचार गरिएको छ । दुबै बालिकाको खुट्टामा चोट लागेको छ ।
पातारासी गाउँपालिका प्रमुख प्रशासकीय अधिकृत विष्णु धितालका अनुसार गाउँपालिकाको शिक्षा शाखा, प्रहरी र प्रमुख जिल्ला अधिकारीसहितको टोलीले साउन २३ गते घटनास्थलको अनुगमन गरेको छ । उहाँले भन्नुभयो भत्किएको भवनको पुर्ननिर्माणका लागि बजेटको व्यवस्थापन गर्नेछौँ ।
तत्काल पठनपाठनका लागि दुई कक्षाका विद्यार्थी एउटै कक्षा कोठामा राखेर बहुकक्षा शिक्षण विधिमार्फत पठनपाठन गर्ने व्यवस्थापन गरिएको उहाँले बताउनु भयो । उक्त भवन कच्ची रहेको थियो ।