हंसपुर नगरपालिका अन्तर्गतका सामुदायिक विद्यालयमा कार्यरत बालविकास शिक्षक तथा विद्यालयका कर्मचारीहरू विगत आठ महिनादेखि तलबबाट वञ्चित भएको गुनासो गरेका छन् । नेपाल सरकारले तय गरेको पारिश्रमिक नगरपालिकाले उपलब्ध गराउन सकेको छैन ।
हंसपुर नगरपालिकाका प्रमुख प्रदिप यादवलाई तलव उपलब्ध गराउन बालविकास शिक्षक तथा विद्यालयका कर्मचारीहरूले पटक–पटक माग गरेपनि कुनै सुनुवाई नभएको शिक्षकहरूको गुनासो छ ।
बालविकास शिक्षक तथा विद्यालय कर्मचारी संयुक्त सङ्घर्ष समितिका संयोजक रेणु मण्डलले आफूहरूले विगत आठ महिनादेखि तलब नपाएको गुनासो गर्नु भयो ।
लामो समयदेखि तलब नपाउँदा आर्थिकसँगै सामाजिक र सांस्कृतिक अधिकार नै हनन् भएको उहाँले बताउनु भयो ।
असार ३० गते नै नगर प्रमुख यादवलाई समस्या समाधान गर्न ज्ञापनपत्र बुझाएको संयोजक मण्डलले बताउनु भयो ।
ज्ञापन पत्र बुझाएको भएपनि हालसम्म नगर प्रमुखले कुनै चासो नदेखाएको उहाँको आरोप छ ।
हंसपुर नगरपालिकाका कार्यपालिका सदस्य राजेश पासवानका अनुसार शिक्षक र विद्यालय कर्मचारीहरूको तलब अविलम्ब उपलब्ध गराउनुपर्ने बताउनु भयो ।
उहाँले आठ महिनासम्म तलब नपाएर विद्यालयमा पढाउनुपर्दाको कठिनाई र यसले शिक्षण सिकाइमा पार्न सक्ने असरलाई मध्यनजर गर्दै अविलम्ब नगरपालिकाबाट रकम उपलब्ध गराउनुपर्नेमा कार्यपालिका बैठकमा माग गर्ने बताउनु भयो ।
नगरपालिकाका प्रमुख प्रदिप यादवले बालविकास र विद्यालयमा कार्यरत कर्मचारीहरूलाई तलब खुवाउने विषय आपूm निर्वाचित हुनुभन्दा पहिलेदेखिकै घटना भएको बताउनु भयो ।
यसबारे शिक्षा शाखामार्फत जानकारी लिँदै के कति कारणले उहाँहरूको तलब नदिएको सो बारेमा जानकारी लिएर समस्या समाधान गर्ने बताउनु भयो ।
हाल नेपाल सरकारले ८ हजार र स्थानीय तहले ७ हजार रुपियाँ दिनुपर्ने प्रावधान रहेको छ । सोही अनुसार विद्यालयमा कार्यरत लेखापालको मासिक तलब १८ हजार ५ सय र बालविकास शिक्षक तथा कार्यालय सहयोगीको तलब १५ हजार रुपियाँ रहेको छ ।
हंसपुर नगरपालिकाभित्रका ३० ओटा सामुदायिक विद्यालयमा ७१ जना कर्मचारीहरू कार्यरत रहेका छन् । जसमध्ये बालविकासका ४९ जना, सहयोगी १९ जना र तीन जना लेखापालहरू छन् ।