मोरङ कारागारमा सजाय भुक्तान गरिरहेका सुन्दरहरैँचा नगरपालिका–४ का ३९ वर्षीय नीरबहादुर नेपालको उपचारका क्रममा असार ३१ गते मृत्यु भएको कारागार प्रशासनले जनाएको छ ।
अत्यधिक ज्वरो आएर उपचारका लागि असार ३० गते कोशी अस्पतालमा भर्ना गरिएका नेपालीको उपचारका क्रममा मृत्यु भएको कारागार प्रशासनले जनाएको छ ।
मृतक नेपालीमा कोभिड–१९ को सङ्क्रमण पुष्टि भएको कोशी अस्पतालका मेडिकल सुपरिटेण्डेन्ट डाक्टर यज्ञराज खरेलले बताउनु भएको छ ।
अत्यधिक ज्वरो आएर उपचारका लागि भर्ना गरिएका अन्य कैदीबन्दीहरूको एण्टीजेन परीक्षण क्रममा कोभिड–१९ को सङ्क्रमण पुष्टि भएको कोशी अस्पताल प्रशासनले जनाएको छ ।
बिरामी परेका कैदीबन्दीहरूको कोशी अस्पतालमा असार ३१ गते गरिएको एण्टीजेन परीक्षणमा सङ्क्रमण पुष्टि भएको मेसु खरेलले बताउनु भयो ।
विराटनगर महानगरपालिका–८ मा स्थित कारागार प्रशासनले अत्यधिक ज्वरो आएपछि १८ जना कैदीबन्दीलाई असार ३० गते उपचारका लागि कोशी अस्पताल भर्ना गरेको थियो ।
बिरामी भएर भर्ना गरेका मध्ये १६ जनाको एण्टीजेन पोजेटिभ र दुई जनाको नेगेटिभ रिपोर्ट आएको अस्पतालका मेडिकल सुपरिटेण्डेन्ट डाक्टर यज्ञराज खरेलले बताउनु भएको छ ।
ज्यान मार्ने उद्योगको मुद्दामा जिल्ला अदालतले दोषी ठहर गरेपछि ०७६ साउन २५ गतेदेखि नीरबहादुर नेपाल कारागारमा बसेर कैद सजाय भुक्तान गरिरहेका थिए ।
पीडित पक्षले असार ३१ शव बुझी लगेको कोशी अस्पताल प्रशासनले जनाएको छ ।
पीडित पक्षले सुन्दरहरैँचा नगरपालिका–४ स्थित घाटमा सद्गत गर्ने जनाएको छ ।