जिल्ला अदालत इलाम परिसरमा ४५ वर्षीया विमलाकुमारी पराजुलीको हत्या गरेको कसुरमा अदालतले धनकुटा स्थायी घर भई इलाम नगरपालिका–५ का बस्दै आएका ३५ वर्षीय युवराज बानियालाई जन्म कैद सजायको फैसला गरेको छ ।
न्यायाधीश हरिश्चन्द्र इङ्गनामको असार २७ गतेको इजलासले कसुर गरेको ठहर गर्दै जन्म कैद सजायको फैसला गरेको अदालतका श्रेस्तेदार फणिन्द्र भट्टराईले बताउनु भयो ।
पीडित विमलाकुमारीको शव ०७८ असार २८ गते जिल्ला अदालत परिसरमा अर्ध नग्न अवस्थामा फेला परेको थियो ।
महिलाको शव फेला परेपछि प्रहरीले जिल्ला अदालतका न्यायाधीशको सुरक्षा गार्डका रूपमा कार्यरत असइ युवराज बानियालाई तत्काल गिरफ्तार गरी अनुसन्धान गरेको थियो ।
अनुसन्धानका क्रममा आरोपितले लेनदेन विवादकाबिच हत्या गरेको र विमलाले लगाएको एक तोलाको सुनको सिक्री चोरी गरेको बयान दिएपछि प्रहरीले हत्या र चोरी शीर्षकमा ०७८ साउन २६ गते जिल्ला अदालतमा मुद्दा दर्ता गरेको थियो ।
हत्या कसुरमा जन्म कैद र चोरी कसुरमा थप एक वर्ष कैद सजायको आदेश भएको श्रेस्तेदार भट्टराईले बताउनु भयो ।
शवको पोष्टमार्टम वीपी कोइराला स्वास्थ्य विज्ञान प्रतिष्ठान धरान घोपामा ०७८ असार २९ गते गरिएको थियो ।