सिदिङ्मा गाउँपालिकामा कार्यरत २८ वर्षीया अनमी पुजन राईलाई वैशाख १८ गते हातपात गरेको आरोपमा प्रहरीले सिदिङ्मा गाउँपालिका–४ साब्लाखुका २२ वर्षीय सन्दीप इदिङ्गो लिम्बूलाई वैशाख १९ गते गिरफ्तार गरेको छ ।
झापा, गौरीगञ्ज गाउँपालिका–१ स्थायी घर भई गाउँपालिका केन्द्र साब्लाखुस्थित स्वास्थ्य केन्द्रमा बसीरहेको अवस्थामा गालीगलौजसहित कुटपिट गरेको आरोपमा प्रहरीले लिम्बूलाई गिरफ्तार गरेको प्रमुख जिल्ला अधिकारी महेशकुमार पोखरेलले बताउनु भयो ।
गाउँपालिकाका कर्मचारीले वैशाख १९ गते प्रेस विज्ञप्ति जारी गरेर दोषीलाई कारबाही गर्न माग गरेका छन् ।
गाउँपालिकाका निमित्त प्रमुख प्रशासकीय अधिकृत रूद्र वेघाले स्वास्थ्यकर्मीलाई विना कारण आक्रमण गरेकाले दोषीलाई कारबाही गर्न माग गर्दै विज्ञप्ति जारी गरेको बताउनु भयो ।
पीडित राईले आरोपितविरूद्ध वैशाख १९ गते साब्लाखु प्रहरी कार्यालयमा लिखित उजुरी दिनु भएको छ ।
पीडितले इन्सेक प्रतिनिधिसँगको फोन सम्पर्कमा भन्नुभयो “म डेरा बसेको घरमा खाना खाने तयारीमा थिए । एक्कासी मेरो गालामा दुई थप्पड हिर्कायो । त्यसपछि कता गयो थाहा पाईँन् ।”
मानव अधिकार रक्षकसम्बन्धी घोषणापत्र सन १९९८ ले स्वास्थ्यकर्मीलाई मानव अधिकार रक्षकका रुपमा परिभाषित गरेको छ ।
