जुम्लाको पूर्वी भेगमा पर्ने गुठीचौर गाउँपालिका–५ देपालगाउँस्थित हिमाली बोर्डिङ स्कूलका विद्यार्थीले म्याद नाघेको ट्याङजुस खाँदा बिरामी परेका छन् ।
व्यापारीले जथाभावी म्याद नाघेका अखाद्य वस्तु विक्रीवितरण गर्ने गरेका छन् । त्यही म्याद नाघेका अखाद्य वस्तु ट्याङजुस खाँदा विद्यार्थी बिरामी परेका हुन् ।
यहाँका गाउँघरतिर सञ्चालनमा रहेका साना बजारमा म्याद नाघेका अखाद्य वस्तु बढी पाइने गरेका छन् । स्थानीय तहलाई बजार अनुगमन गर्ने र अखाद्य वस्तु नियमन गर्ने अधिकार भएपनि यस्ता विषयमा जनप्रतिनिधिले त्यति चासो दिने गरेको पाइँदैन । जसले गर्दा सहजै रुपमा नागरिकको मुखसम्म अखाद्य वस्तु पुग्ने गरेको छ ।
हिमाली बोर्डिङ स्कूलका प्रिन्सिपल मन्जिल गिरीका अनुसार विद्यार्थीले म्याद नाघेको ट्याङजुस खाएपछि विद्यार्थी बिरामी भएका हुन् ।
उहाँले भन्नु भयो-‘पानीमा पनि केही समस्या हो कि भन्ने आशंका भएपछि पानी परीक्षण पनि गर्न थालिएको छ ।’
२ सय ६० जना विद्यार्थीमध्ये २५ जना विद्यार्थी बिरामी भएका उहाँले बताउनु भयो । विद्यार्थीको पेट दुख्ने, टाउको दुख्ने समस्या देखिएको उहाँको भनाइ छ ।
उहाँले भन्नु भयो-‘बुधबारदेखि आउँदो आइतबारसम्म विद्यालय बन्द गरेका छौँ । स्कूल नजिकैको स्वास्थ्य चौकीमा लिएर औषधि खुवाएपछि अहिले अवस्था सामान्य भएको छ । यस विषयमा अभिभावकसँग पनि छलफल गर्ने तयारी गरेका छौँ । पानी परीक्षण गरेपछि मात्रै विद्यालय खोल्ने तयारी गरेका छौँ ।’
म्याद नाघेको ट्याङजुस खाएपछि विद्यार्थी बिरामी परेको गुठीचौर गाउँपालिका स्वास्थ्य शाखा प्रमुख अहेव बालराम नेपालीले बताउनु भयो ।
उहाँले भन्नु भयो-‘औषधि खुवाएपछि अवस्था सामान्य भएको छ । पानी, घामले पनि यस्तो समस्या देखिएको हुन सक्छ । अहिले स्वास्थ्य चौकीमा पेट दुख्ने र टाउको दुख्ने बिरामी बढी आउने गरेका छन् ।’