पर्साको बीरगंज महानगरपालिका–१३ श्रीपुर टोलकी २८ वर्षीया सीता पटेल चैत ११ गते माइतिघर जिल्ला बारा कलैया उपमहानगरपालिका–२३ कोइरिया टोल आउँदा माइती नजिक मोटरसाइकलमा आएका ५० वर्षीय ससुरा हवारी साह र ३२ वर्षीय जेठाजु रामबाबु साहले शरीरमा एसिड छ्यापेर घाइते बनाएको आरोपमा प्रहरीले आरोपितद्वयलाई चैत ११ गते गिरफ्तार गरेको छ ।
पीडित महिलालाई घरायसी विषयमा विवाद गर्दै गाली गरेकाले माइत आउँदा मोटरसाइकलबाट पिछा गरेर आएका आरोपितद्वयले एसिड प्रहार गरेको पीडितको भनाइ छ ।
एसिड प्रहारका कारण पीडित महिलाको अनुहार, छाती, हातगोडालगायत शरीरका विभिन्न अङ्ग जलेको छ ।
घाइते महिलालाई प्रादेशिक अस्पताल कलैयामा प्राथमिक उपचार गराएर थप उपचार नारायणी उपक्षेत्रीय अस्पताल बीरगंजमा उपचार भइरहेको कलैया अस्पतालका मेडिकल सुपरिटेण्डेण्ट गौरव महतोले बताउनु भयो ।
माइती पक्षले जिल्ला प्रहरी कार्यालय बारामा चैत ११ गते आरोपितविरूद्ध उजुरी दिएको छ ।