मेचीनगर नगरपालिका–५ कमल डाँडाकी ६७ वर्षीया अम्बिका कुँवरको फागुन २५ गते गरेको हत्या गरेको आरोपमा प्रहरीले सोही ठाउँका २७ वर्षीय रणबहादुर बस्नेतलाई फागुन २५ गिरफ्तार गरेको छ ।
अम्बिका कुँवरको शव घरदेखि ५ सय मिटर पश्चिम खोल्सीमा फागुन २५ गते फेला परेको थियो ।
हसिँया लिएर घास काट्न गएकी अम्बिकाको अनुहारमा चोट, हसियाँ बाङ्गिएको र लछारपछार पारिएको अवस्थामा शव भेटिएको मेचीनगर नगरपालिका–५ का वडाध्यक्ष योगेन थापाले बताउनु भयो ।
घटनाको प्रकृति हेर्दा पीडितले आत्मरक्षाको प्रयास गरेको जस्तो देखिएको जिल्ला प्रहरी कार्यालयका डिएसपी वसन्त पाठकले इन्सेक प्रतिनिधिसँगको फोन सम्पर्कमा बताउनु भयो ।
घटनापछि शङ्कास्पद गतिविधिका आधारमा आरोपितलाई अनुसन्धानका लागि गिरफ्तार गरेको डिएसपी पाठकको भनाइ छ ।
शवको पोष्टमार्टम फागुन २६ गते वीपी कोइराला स्वास्थ्य विज्ञान प्रतिष्ठान धरान घोपामा गर्ने तयारी गरिएको प्रहरीले जनाएको छ ।