१६ वर्षीया बालिकालाई बलात्कार गरेको कसुरमा जिल्ला अदालत सङ्खुवासभाले गरेको फैसलालाई बदर गरी उच्च अदालत विराटनगर धनकुटाले खाँदवारी नगरपालिका–१ का २८ वर्षीय अष्टकुमार राईलाई १० वर्ष कैद सजाय तोकेको छ ।
उच्च अदालत विराटनगर धनकुटाले ०७८ फागुन ११ गते जिल्ला अदालतको फैसला बदर गर्दै १० वर्ष कैद सजाय र पीडितले पाउने गरी कसुरदारबाट २५ हजार रुपियाँ क्षतिपूर्ति भराउन आदेश भएको अदालतका श्रेस्तेदार केदारप्रसाद गौतमले बताउनु भयो ।
जिल्ला अदालतका न्यायाधीश शान्तिप्रसाद आर्चायको ०७७ कात्तिक १८ गते इजलासले कसुर गरेको ठहर गर्दै दुई वर्ष कैद सजायको फैसला सुनाएको थियो ।
अदालतको फैसलापछि कसुरदारले ०७८ कात्तिक २९ गते दुई वर्षसम्म कारागारमा बसी सजाय भुक्तान गरेका थिए ।
पीडित बालिकालाई आरोपितले ०७६ कात्तिक २२ गते बलात्कार गरेको आरोपमा पीडित पक्षले आरोपितविरूद्ध कात्तिक २६ गते जिल्ला प्रहरी कार्यालयमा उजुरी दिएको थियो ।
पीडित पक्षको उजुरीका आधारमा प्रहरीले आरोपितलाई कात्तिक ३० गते खाँदबारीबाट गिरफ्तार गरी जिल्ला अदालतमा मङसिर १० गते बलात्कार शीर्षकमा मुद्दा दर्ता गरेको थियो ।
उच्च अदालत विराटनगर धनकुटाको आदेशपछि प्रहरीले आरोपितलाई फागुन १५ गते खाँदबारीबाट गिरफ्तार गरेको जिल्ला प्रहरी कार्यालयका इन्स्पेक्टर शुभेष अधिकारीले इन्सेक प्रतिनिधिको फोन सम्पर्कमा बताउनु भयो ।
जिल्ला अदालतमा उपस्थित गराएर कसुरदारलाई फागुन १६ गते कारागार चलान गरिएको इन्स्पेक्टर शुभेष अधिकारीले बताउनु भयो ।
पीडित बालिकाको स्वास्थ्य परीक्षण जिल्ला अस्पतालमा ०७८ कात्तिक २६ गते गरिएको थियो ।