पाँच वर्षीया बालिकालाई ०७७ माघ ११ गते बलात्कार गरेको कसुरमा जिल्ला अदालतले चौदण्डीगढी नगरपालिका–४ का ४५ वर्षीय थीरबहादुर दर्जीलाई भदौ ३० गते जन्म कैद सजायको फैसला सुनाएको छ ।
न्यायाधीश माधवप्रसाद सुवेदीको इजलासले कसुर गरेको ठहर गर्दै जन्म कैद सजायको फैसला सुनाएको जिल्ला अदालतका श्रेस्तेदार धनकुमार कार्कीले इन्सेक प्रतिनिधिसँगको फोन सम्पर्कमा बताउनु भयो ।
पीडित बालिकालाई आरोपितले ०७७ माघ ११ गते बलात्कार गरेको आरोपमा पीडित पक्षले आरोपितविरूद्ध ०७७ फागुन १६ गते इलाका प्रहरी कार्यालय वेल्टारमा उजुरी दिएको थियो ।
पीडित पक्षको उजुरीका आधारमा आरोपितलाई प्रहरीले सोही दिन गिरफ्तार गरी जिल्ला अदालतमा चैत ८ गते बलात्कार शीर्षकमा मुद्दा दर्ता गरी कारबाही अघि बढाएको थियो ।
जिल्ला अदालतका न्यायाधीशको ०७७ चैत ९ गतेको आदेशमा आरोपित पुर्पक्षका लागि थुनामा गएका थिए ।
पीडित बालिकाको स्वास्थ्य परीक्षण जिल्ला अस्पतालमा ०७७ फागुन १६ गते गरिएको थियो ।