बटेश्वरमा ४५ वर्षीय पुरुष बिरामीको उपचार अभावमा वैशाख २१ गते बिहान छटपटिएर मृत्यु भएको छ ।
पाँच दिनदेखि रुघाखोकी र ज्वरोबाट पीडित उनलाई वैशाख २० गते साँझ ८ बजे उपचारका लागि जनकपुरस्थित प्रादेशिक अस्पताल जनकपुरमा ल्याइएको थियो ।
प्रादेशिक अस्पतालको आइसोलेशनमा बेड खाली नभएपछि जनकपुरकै केही निजी अस्पतालमा समेत लैजाँदा उनलाई भर्ना नगरेपछि एम्बुलेन्स चालकले परिवारजनको आग्रहमा पुनः बटेश्वरमै ल्याएका थिए ।
बटेश्वरस्थित एक मेडिकल हलको अगाडि बरण्डामा अक्सिजन अभावमा छटपटिएर उनको मृत्यु भएको एम्बुलेन्स चालक रामबाबु महतोले बताउनुभएको छ ।
एम्बुलेन्स चालक महतोका अनुसार उनको शरीरमा अक्सिजनको मात्रा ४५ मात्र थियो । एम्बुलेन्समा अक्सिजन लगाएर उपचारको लागि जनकपुर लगेको उहाँले बताउनुभयो ।
उनलाई कोभिड सङ्क्रमणको आशङ्का गरिएको भएपनि पिसिआर परीक्षण भने हुन सकेको थिएन ।