कोरोना भाइरस(कोभिड १९) सङ्क्रमित एवम् सङ्क्रमण आशङ्का गरिएका बिरामीको उपचारका क्रममा स्वास्थ्यकर्मीहरूले प्रयोग गर्ने पीपीइ (पर्सनल प्रोटेक्टिभ इक्विपमेण्ट) व्यक्तिगत सुरक्षा उपकरण नेपाली सेनाले निर्माण गरी जिल्ला अस्पताललाई उपलब्ध गराएको छ ।
नेपाली सेनाको बरख गण सल्लेरी ब्यारेकका सेनाहरुले स्थानीय स्रोत साधन एवम् घरेलु सामग्रीहरू प्रयोग गरेर पीपीइ तयार गरेका छन् ।
घरेलु सामग्रीको प्रयोग गरेर बनाइएको १० थान पीपीइ चैत २० गते जिल्ला अस्पताललाई हस्तान्तरण गरिएको गणपति भगवान थापा मगरले बताउनु भयो । उहाँले कोरोना सङ्क्रमणको आशङ्का भएका व्यक्तिहरूको प्रत्यक्ष सम्पर्कमा आउने स्वास्थ्यकर्मीहरूलाई केही सुरक्षित हुन मद्दत मिलोस भनेर पीपीइ तयार गरिएको बताउनुभयो ।
क्वारेन्टाइनमा राखिएका व्यक्तिहरू सङ्क्रमित नभए पनि उनीहरूको आसपासमा रहनेहरूलाई सुरक्षित महसुश गराउन पीपीइ बनाइएको बरख गणले जनाएको छ ।
“शत प्रतिशत प्रमाणित होइन,तर सुरक्षित महसुस दिलाँउछ र केही प्रतिशत भएपनि जोखिम कम हुन्छ । किटाणु भएसिधै सम्पर्कमा आउदैन’, थापाले भन्नुभयो ।
पीपीइ एक पटक मात्र प्रयोग गर्न मिल्छ । एक पटक प्रयोग गरिसके पछि तत्काल नष्ट गरिहाल्नु पर्ने थापाको भनाइ छ।